Италијанскиот тинејџер Карло Акутис, кој почина од леукемија во 2006 година, на 15-годишна возраст, ќе стане првиот католички светец од милениумската генерација во недела, на церемонијата на канонизација предводена од папата Лав XIV на плоштадот Свети Петар, каде се очекува да присуствуваат десетици илјади верници. Неговата приказна го привлече вниманието на католичката младина, а сега ќе биде издигнат на исто ниво како Мајка Тереза и Франциск Асишки. Прогласувањето за светец значи дека Црквата верува дека лицето живеело свет живот и сега е во рајот со Бога.
Карло Акутис користеше компјутерски вештини за ширење на верата, а до неговата смрт ги водеше веб-страниците на Миланската бискупија, а подоцна и на Ватиканската академија. Веќе прогласен за благословен од Католичката црква во 2020 година и „Божји инфлуенсер“ или „сајбер апостол“, Акутис го помина поголемиот дел од својот краток живот ширејќи ја католичката вера на интернет. Сега тој привлекува нови генерации аџии на своето почивалиште.
Тој посветено веруваше во чуда, а кратко пред неговата смрт го заврши развојот на веб-страница за следење на локациите на пријавените католички чуда низ целиот свет.
Роден е во Лондон на 3 мај 1991 година, а неговите родители се Италијанци и тој воглавно пораснал во Милано. Празниците ги поминувал во вториот дом на семејството во Асизи, а починал во Монца во северна Италија. Неговото семејство е богато и не било религиозно, но тој од мал бил исполнет со страсна вера.
Мајката на Акутис, Антонија Салзано, изјави за Ројтерс претходно оваа година дека суштината на привлечноста на нејзиниот син кон католичката младина е тоа што тој живеел како другите тинејџери во 2000-тите.
„Карло беше обично дете како другите. Тој си играше, имаше пријатели и одеше на училиште. Но, неговиот извонреден квалитет беше тоа што ја отвори вратата на своето срце за Исус и го стави Исус на прво место во својот живот“, рече таа. Тој ја користеше оваа вештина за да ја шири добрата вест, евангелието – додаде таа.
Карло Акутис бил талентиран за работа на компјутери, ги сакал видео игрите и ги ширел учењата на Исус Христос на интернет, додека истовремено бил свесен и за опасностите. Неговата мајка рече дека купил PlayStation кога имал осум години, но се ограничил на еден час играње игри неделно, бил претпазлив, сфаќајќи дека сè подолго од тоа може да биде зависност.
Ватикан призна две чуда поврзани со Акутис, а според католичките правила, тие се предуслов за негова канонизација. Првото чудо му се припишува во 2020 година, кога се вели дека во 2013 година посмртно посредувал во лекувањето на бразилско момче кое страдало од ретка панкреасна болест.
Минатата година, припишано му е и лекувањето на еден студент од Костарика кој бил сериозно повреден во несреќа, па затоа неговиот гроб привлекува голем број аџии и љубопитни посетители.
Како што Акутис напредуваше по официјалниот пат на Црквата кон прогласување за светец, неговото тело беше преместено во црква во ридестото гратче Асизи во централна Италија, од каде што е роден Свети Франциск, во согласност со последните желби на Акутис. Последното почивалиште на новиот светец, каде што Акутис е погребан облечен во спортска маица, фармерки и патики, стана популарно и привлекува илјадници верници секој ден.
