Најтиражниот спортски весник во Италија, „Газета дело Спорт“ известува за строгите правила на Масимилијано Алегри за подготовките на калчо гигантот Милан, вклучувајќи два тренинзи на ден и задолжителен појадок и вечера во Миланело. Седумкратниот европски клупски шампион ќе ги започне подготовките за сезоната 2025/26 во понеделник, 7 јули, истиот ден како и Џенова, порано од кој било друг клуб од Серија А.
Истиот извор известува дека Милан претходно планирал да ги започне подготовките на 10 или 11 јули, но Алегри одлучил да започне порано за да има повеќе време да работи со играчите.
Според извештајот, речиси сите играчи ќе бидат присутни во Миланело на 7 јули, вклучувајќи го и Рафаел Леао. Три дена претходно, на 4 јули, играчите на Милан ќе бидат подложени на медицински тестови пред да започнат тренинзите.
Играчите кои ја завршија сезоната играјќи меѓународни натпревари во јуни нема да добијат дополнителни слободни денови. Единствени исклучоци се Сантијаго Хименез, кој сè уште е во Мексико, и Лука Модриќ, кој игра на Светското клупско првенство со Реал (М).
Првиот дел од подготовките на Милан ќе се одржи во Миланело, при што првиот тренинг за денот е закажан за 9:30 часот наутро, а вториот во 18:00 часот по локално време. На играчите ќе им се советува строго да преноќат во Миланело и да не се враќаат дома по вечерата, што ќе биде задолжително во тренинг кампот на клубот, исто како и појадокот наутро.
Вториот дел од подготовките на Милан ќе се одржи во Азија, каде што ќе бидат одиграни пријателски натпревари против Арсенал во Сингапур на 23 јули, Ливерпул во Хонг Конг на 26 јули и Перт Глори во Перт (Австралија) на 31 јули.
