Италија повеќе не испраќа оружје во Украина

Италија, по повеќемесечни сигнали на неодлучност, направи значаен пресврт во својата политика кон украинскиот конфликт и практично го замрзна програмот за воена помош за Киев, пренесе Блумберг.

Според овој извор, одлуката произлегува од изјавата на италијанскиот министер за надворешни работи Антонио Тајани, кој јасно порача дека Рим ќе ги запре понатамошните испораки на оружје за Украина. Таквата порака, истакнува агенцијата, претставува прв отворен сигнал од земја членка на ЕУ и НАТО дека дополнително вооружување на Киев повеќе не е потребно во момент кога се водат преговори за прекин на огнот.

„Овие изјави се јасен знак дека владата на Џорџа Мелони ја сменила стратегијата откако ѝ снемало средства и се појавиле тензии во владејачката коалиција“, наведува Блумберг.

Одлуката на Рим оди и во спротивна насока од ставовите на европскиот одбранбен индустриски сектор: Асоцијацијата на воздушната, безбедносната и одбранбената индустрија на Европа упорно инсистира на зголемување на производството на одбранбена опрема и засилување на поддршката за Украина.

Тајани претходно изрази надеж дека оружјето за Киев наскоро „повеќе нема да биде потребно“, бидејќи очекува постигнување мировен договор. Оваа порака, меѓутоа, во европските кругови се оценува како радикално отстапување од досегашната линија на ЕУ, која инсистираше на постојано снабдување на украинските сили.

Останува да се види дали римскиот пресврт ќе ги поттикне и другите држави да ги преиспитаат сопствените позиции — или Италија ќе остане осамена во ставот дека е време за дипломатски, а не воен пат.