Истрагата открива опасни намери: Преполни досиеата на осомничените за подготовка на атентат на Вучиќ

Двајцата мажи, кои се уапсени вчера во Краљево се осомничени за подготовка на атентат врз претседателот на Србија Александар Вучиќ и неговото семејство. Истрагата открива сериозни терористички намери, пишуваат српските медиуми.

Поднесена е кривична пријава против маж (50) и маж (42) од Краљево поради сомнение дека како соизвршители подготвувале дела против уставниот поредок и безбедноста на Србија, а според првичните информации, двајцата се осудувани и претходно.

Според неофицијални информации, мажот (42) бил осуден во Црна Гора за носење оружје за кое немал дозвола, додека во Франција бил осуден за кражба. Мажот (50) бил осуден за напад врз службено лице при вршење на неговата должност – изјави извор запознаен со случајот.

Осомничени за планирање напад врз претседателот на Србија и неговото семејство

Министерството за внатрешни работи вчера објави дека се уапсени двајца мажи под сомнение дека како соизвршители извршиле кривично дело подготовка на дело против уставниот поредок и безбедноста на Србија, во врска со кривичното дело напад врз уставниот поредок.

– Тие се осомничени дека помеѓу декември 2025 и февруари 2026 година, организирале насилна промена на уставниот поредок на Република Србија и соборување на највисоките државни органи, преку организирање на набавка на оружје и напад врз животот и телото на претседателот на Република Србија, Александар Вучиќ, неговата сопруга и децата, на начин што ќе ги лиши од живот, како и напад врз припадници на Министерството за внатрешни работи на Република Србија, на начин што ќе им нанесе телесни повреди на припадници на Министерството за внатрешни работи – се вели во соопштението на Министерството за внатрешни работи.

Како што објави Вишиот суд во Краљево, со решение на судијата за претходна постапка на тој суд, а по предлог на Вишото јавно обвинителство во Краљево, на осомничените им е одреден притвор до 30 дена.