Владата на францускиот претседател Емануел Макрон прикривала одлуки за нелегален третман на минерална вода од страна на прехранбениот гигант „Нестле“, вклучувајќи го и светски познатиот бренд Периер, соопшти денес истражниот комитет на Сенатот, пренесува Бета. Извештајот анализира повеќегодишни активности на Нестле за да се избегне бактериска или хемиска контаминација на водата што ја означува како „природна минерална вода“ или „изворска вода“ за своите брендови „Контрекс“, „Вител“ и „Хепар“. Ваквите третмани се забранети со француските и европските регулативи.
Извештајот заклучува дека француската влада ја прикрила „нелегалната пракса“.
Регулативите на ЕУ бараат природната минерална вода да не смее да се подложи на никаква дезинфекција или третман што би можел да ги промени нејзините карактеристики.
Француските медиуми објавија за забранетите третмани минатата година.
Во извештајот на Сенатот се наведува „намерна стратегија“ за прикривање од првиот состанок на кабинетот за ова прашање во октомври 2021 година. Неколку месеци подоцна, властите се согласија со планот на „Нестле“ да ги замени забранетите третмани со микрофилтрација.
Минатата година, швајцарската компанија јавно призна дека користела третмани со минерална вода и се согласи да плати казна од два милиони евра за да избегне судска постапка.
Истражната комисија разговараше со повеќе од 120 службеници запознаени со ова прашање, а само едно лице одби да биде интервјуирано: Алексис Колер, тогашен генерален секретар на претседателската палата во Елисеј, за кој се вели дека неколку пати разговарал со раководителите на „Нестле“.
Комисијата заклучи „дека Претседателството на Републиката знаело барем од 2022 година дека „Нестле“ измамува со години“.
Запрашан во февруари за скандалот, Макрон рече дека „не е свесен за овие работи… нема договор со никого“.
Александар Уизил, известувачот на комисијата, рече дека француската агенција за контрола на измами проценила дека вкупниот износ на измамата е повеќе од три милијарди евра.
Природната минерална вода се продава за околу 100 до 400 пати повеќе од водата од чешма, рече тој, осудувајќи ја „измамата на потрошувачите“.
Уизил опиша фабрика на Нестле во јужна Франција што ја посетила комисијата, велејќи дека „нелегален третман на вода се вршел во простории скриени зад плакари“.
Во извештајот се вели дека Нестле тврди дека доколку владата не одобри некаков вид третман или микрофилтрација на водата, нејзините фабрики ќе мора да се затворат поради контаминација на изворската вода со бактерии како што е E. coli, кои можат да предизвикаат болест и смрт.
