Иранските граѓани велат не на отстапките кон САД: „Преговорите се само изговор за војна, збогатениот ураниум ни припаѓа нам“

Додека преговорите за ставање крај на тримесечната војна меѓу Соединетите Американски Држави (САД) и Иран продолжуваат во сенка на нови воени напади, во Техеран расте незадоволството кон американскиот претседател Доналд Трамп.

Трамп денеска изјави дека Техеран „навистина сака да склучи договор“ за кој рече дека би бил од корист за Вашингтон и неговите сојузници. Сепак, важно е да се напомене дека изјавата на Трамп доаѓа само неколку часа откако американската војска изврши напади врз иранските воени објекти во текот на викендот, на што Иранската револуционерна гарда одговори со испукување ракети врз американската база во регионот.

Иако Трамп објави дека наскоро ќе донесе одлука за предложениот договор за продолжување на прекинот на огнот, од улиците на Техеран се испраќа сосема поинаква порака.

Видео анкетата на Ројтерс на улиците на Техеран покажа дека Иранците изразуваат длабока недоверба кон каков било договор со Вашингтон.

Студентка која побара да остане анонимна во изјава за Ројтерс вели дека нема можност Техеран да прави отстапки кон САД.

„Мислам, со оглед на прекршените ветувања што (САД) ги дадоа досега, дека ова нема да се случи. Преговорите се само изговор за уште една војна, за понатамошно навлегување на територијата на земјата и нема да доведат до никакви резултати. Нема можност за правење какви било отстапки кон САД. Збогатениот ураниум што го имаме ни припаѓа нам, нуклеарната енергија што ја поседуваме зависи од тоа, а областите на експертиза што ги имаме би се соочиле со проблеми ако се откажеме од збогатениот ураниум. Нашата нуклеарна медицина исто така би била засегната. Никогаш нема да го сториме тоа. Дури и ако постојано бидеме бомбардирани, никогаш нема да направиме овие отстапки“, рече таа.

Граѓаните исто така рекоа дека „Ормускиот теснец, ураниумот, како и остатокот од земјата, е легитимно право на Иран и дека никој нема право да коментира за тоа“.

Иранецот Мостафа Мардани рече дека непријателството меѓу Иран и САД не може да се реши преку преговори.

„Ние сме под санкции веќе неколку години. Затворањето на Ормускиот теснец покажува дека, едноставно кажано, сега е наш ред да ја санкционираме Европа или САД“, рече тој.

Исто така, на плоштадот Валијаср во Техеран се видливи антиамерикански мурали со натпис „Долу САД“.