Иран е подготвен решително да им одговори на САД и Израел, изјави денес командантот на Иранската револуционерна гарда (IRCG), Мохамед Пакпур.
„Иран е подготвен решително да им одговори на своите непријатели Израел и САД“, изјави командантот на IRGC Мохамед Пакпур, обвинувајќи ги нивните лидери дека стојат зад протестите што ја зафатија Исламската Република, објави France24.
Тој рече дека ИРГК е „на врвот на борбената готовност“ и подготвена „решително да одговори на погрешната пресметка на непријателот“.
Во писмена изјава цитирана од државната телевизија, Пакпур ги обвини американскиот претседател Доналд Трамп и израелскиот премиер Бенјамин Нетанјаху дека се „убијци на иранска младина“.
Порано денес, командантот на воздухопловните сили на ИРГК, Маџид Мусави, прогласи највисоко ниво на борбена готовност поради американско-израелската воена реторика.
Тој рече дека воздухопловните сили на ИРГК се на највисоко ниво на борбена готовност, подготвени да ја скршат секоја агресија против Иран, објави иранската мрежа Прес ТВ претходно денес.
Мусави потврди дека производството на борбена опрема за воздухопловство во различни сектори значително се зголемило од 12-дневната американско-израелска војна во јуни 2025 година и дека ранливостите идентификувани за време на војната се целосно адресирани и корегирани.
Началникот на Генералштабот на иранските вооружени сили, Сејед Абдолрахим Мусави, изјави дека настаните од последните денови се директно продолжение на 12-дневната војна и додаде дека по неуспехот во „тешката војна“, противниците на Иран ја промениле својата стратегија во внимателно изработен план кој вклучува обучени терористички елементи на терен.
„Непријателот имплементираше прецизен план, распоредувајќи обучени терористички сили за да извршат најнасилни акции во различни делови на Иран. Размерот на уништување што беше забележан во последните денови е без преседан во историјата на земјата“, рече тој, додавајќи дека една од тактиките на непријателските сили е проектот за создавање жртви во обид да се делегитимизира владата.
Овие изјави на иранските воени претставници следеа по заканите од американскиот претседател Доналд Трамп, кој ги повика демонстрантите во Иран да ги нападнат државните институции, тврдејќи дека американската помош за нив е „на пат“.
Иран претходно објави дека ќе ги удри американско-израелските интереси во Западна Азија во случај на уште една агресија од двата режима, а се потсетува дека за време на 12-дневната војна, Техеран испука салвони од балистички ракети кон израелските воени објекти, како и кон американската воздухопловна база Ал-Удеид во Катар.
