Иран остро и се закани на Америка: Ќе гаѓаме се што ни е во домет!

Иранските власти се заканија дека ќе го ескалираат конфликтот со САД во случај на уште еден американски напад, велејќи дека Исламската Република би можела да се откаже од својата претходна доктрина за ограничена одмазда, која се стремеше да ги ограничи директните конфронтации со Вашингтон, објавува Фајненшл Тајмс..

Врховниот командант на вооружените сили на Иран, генерал-мајор Абдолрахим Мусави, изјави оваа недела дека стратегијата на Иран „порано беше насочена кон спречување на ескалација“, но дека „однесувањето на САД го промени нашиот пристап“.

„Ако овој пат направат грешка, ќе им нанесеме големи загуби, бидејќи нашите вооружени сили се решени до крај да се спротивстават на моќта што врши заплашување“, рече Мусави.

Извор близок до режимот во Техеран рече дека Иран ја прилагодил својата воена доктрина кон САД, преминувајќи од главно симболични одговори кон стратегија што би наметнала реални трошоци врз американските сили и интереси во случај на конфликт.

Според истиот извор, Техеран не бара војна и се надева дека разговорите меѓу САД и Иран во Женева би можеле да го отворат патот за нов нуклеарен договор што би спречил напад од САД. Сепак, се нагласува дека Иран би сакал да влезе во конфликт отколку да капитулира пред американскиот претседател Доналд Трамп.

„Овој пат тоа нема да биде воена игра како одговор“, рече изворот, потсетувајќи на ракетните напади врз американските бази во Ирак во 2020 година и во Катар минатата година, кои беа сигнализирани однапред за да се избегне поширока војна.

„Иран би се движел кон ескалација, таргетирајќи сè што е во неговиот дофат, од американските бази до Ормутскиот теснец и американските воени бродови“.

Портпаролот на иранското Министерство за надворешни работи, Есмаил Багаеи, рече дека одговорот на секој напад би бил „жесток“, додавајќи:

„Не постои такво нешто како ограничен напад“.

Аналитичарите надвор од Иран се скептични во врска со обемот на штетата што Исламската Република би можела да ја нанесе на американската војска, за која се проценува дека распоредила најголем број сили на Блискиот Исток од инвазијата на Ирак во 2003 година.

Воената нерамнотежа беше истакната за време на минатогодишната 12-дневна војна, кога Израел и САД му нанесоа серија тешки удари на Иран. Иранските власти се загрижени дека американските борбени авиони и капацитетите за удар со долг дострел би можеле да ја уништат воената и економската инфраструктура на земјата за само неколку дена.

Сепак, ирански извори велат дека балистичките ракети и беспилотните летала би можеле да послужат како средство за ублажување на конвенционалната супериорност на противникот. За време на јунската војна, Иран испали стотици ракети кон Израел, од кои некои ја пробија израелската одбрана и предизвикаа значителна штета.

Особено внимание се посветува на можноста за блокирање на Ормутскиот теснец, една од најважните светски бродски линии низ која минува голем дел од глобалната трговија со нафта. Порано овој месец, Иранската револуционерна гарда привремено затвори делови од теснецот за време на воените вежби.