Интересот за упис во „Кирил и Методиј“ се зголемува

Во прво одделение во 12 основни училишта во Тетово е запишан 931 ученик. Овој број е речиси ист како минатата година.

Назми Даути од Секторот за образование при Општина Тетово изјави дека, иако првичните податоци од Управата за матични книги покажувале поголем број на деца родени во 2019 година, бројот на првачиња во Тетово останал ист.

– Што се однесува до разликата во бројот на ученици во учебната 2025/2026 во споредба со 2024/2025, бројот на ученици е речиси идентичен. Нема значително зголемување или намалување, иако според првичните податоци од Управата за матични книги, бројот на деца родени во 2019 беше нешто поголем од тие родени во 2018. Но, според статистиката, бројот на запишани ученици во 12 основни училишта во 2024 и 2025 е ист – изјави Даути.

Додека бројот на ученици во другите училишта останува стабилен, интересот за запишување во основното училиште „Кирил и Методиј“ расте.
Таму, досега се запишани околу 130 ученици во прво одделение, што според директорката се должи на условите што ги нуди училиштето.

– Гледајќи ја состојбата во 11 други училишта, но и по селата, секогаш се зборува за намалување на бројот на ученици, додека кај нас бројот само расте. Што се однесува до селата, знаеме дека многу од нив се затворени од различни причини, и жителите се преселуваат во градот. Мислам дека во нашите блокови 70 и 82, каде што се наоѓа нашето училиште, сопствениците ги продаваат становите или ги изнајмуваат. Нашето училиште секогаш било на ниво, но сега уште повеќе се спомнува поради условите, образованието кое го нудиме и постигнатите успеси. Тоа е доказ зошто родителите решаваат да земаат станови под кирија само за да ги запишат децата кај нас – изјави Сихана Каба Касами, директорка на ООУ „Кирил и Методиј“.

Бројот на ученици во ова училиште веќе надминал 1.100. Според директорката, ќе има потреба од отворање нови паралелки бидејќи некои одделенија веќе имаат по 39 ученици.