Индустриското производство во септември пораснало за 2,7 отсто

Индустриската продукција во септември годинава забележала зголемување од 2,7 проценти во споредба со септември минатата година, а за 2,3 проценти во периодот јануари – септември 2025 во однос на тој период од 2024, соопшти Државниот завод за статистика.

Во делот на преработувачката индустрија, во септември 2025 година во споредба со септември 2024 година е евидентиран пораст од 3,1 процент на индустриското производство, а намалување од 2,5 проценти во снабдувањето со електрична енергија, гас, пареа и климатизација и од 1,7 проценти во рударството и вадењето камен.

Најголемо влијание врз растот на индустриското производство во септември 2025 година во однос на септември 2024 година имаат секторите: производство на прехранбени производи со 8,3 проценти, производство на електрична опрема со 8,2 проценти и производство на моторни возила, приколки и полуприколки со 7,7 проценти.

Порастот во секторот преработувачка индустрија е резултат на зголемената продукција и во областите: производство на основни фармацевтски производи и фармацевтски препарати, производство на производи од гума и производи од пластични маси, производство на други неметални минерални производи и производство на мебел.

Според главните индустриски групи, производството во септември 2025 година во однос на септември 2024 година бележи зголемување кај енергијата за 1,6 проценти, интермедијарните производи, освен енергијата за 6 проценти и капиталните производи за 3 проценти, додека бележи намалување кај трајните производи за широка потрошувачка за 5,6 проценти и кај нетрајните производи за широка потрошувачка за 0,6 проценти.