Инцидент на лондонскиот аеродром „Хитроу“: Терминалот 4 беше евакуиран поради „опасни материјали“

Терминалот 4 на аеродромот „Хитроу“ во Лондон беше евакуиран вечерва поради инцидент што пожарникарите првично го опишаа како „можен инцидент со опасни материјали“. По неколкучасовна интервенција на полицијата, пожарникарите и амбулантните возила, терминалот беше прогласен за безбеден и повторно отворен.

Инцидентот беше пријавен околу 17 часот по локално време, а единици од Фелтам, Хитроу, Вембли и околните противпожарни станици беа испратени на местото на настанот. Патниците беа евакуирани од салата за пријавување на растојание од околу 150 метри од зградата, а сведоците велат дека тимови во заштитни одела пристигнале на местото на настанот и биле поставени екрани за приватност.

Еден патник, Пол Скот, изјави за „Скај њуз“ дека штотуку се пријавил кога започнала евакуацијата. „Атмосферата беше мирна, но сите бевме збунети бидејќи никој не знаеше што се случува. На луѓето им беа дадени алуминиумски ќебиња бидејќи стануваше ладно“, рече тој.

Околу 20 лица беа прегледани на лице место поради пријавени здравствени проблеми, потврди Лондонската служба за брза помош. Но, лондоската Метрополитен полицијата соопшти дека „не е пронајдена трага од штетна супстанца“.

„Вкупно 20 лица пријавија здравствени проблеми, но ниту една од повредите не е опасна по живот, ниту ќе има трајни последици. Истрагата е во тек“, соопшти полицијата.

Околу 18:40 часот на аеродромот „Хитроу“ потврди дека салата за пријавување во Терминал 4 е затворена, а кратко по 20:00 часот терминалот беше прогласен за безбеден и повторно отворен.

„Многу ни е жал за прекините, безбедноста на патниците и персоналот е секогаш наш прв приоритет. Правиме сè за летовите вечерва да полетаат според распоредот“, соопшти администрацијата на аеродромот, додавајќи дека другите терминали не беа погодени за време на инцидентот.