На брегот на островот Пашман, помеѓу Невиѓане и островчето Школиќ, археолозите открија неолитско наоѓалиште од петтиот милениум п.н.е. на длабочина од пет метри, објави во недела Универзитетот во Задар.
Истражувањето е спроведено како дел од проектот на Хрватската научна фондација „Потонати неолитски наоѓалишта во подморската зона на хрватскиот Јадран“, предводен од Мате Парица од Одделот за археологија на Универзитетот во Задар.
Археолозите идентификуваа импресивна вештачка структура под морето, долга повеќе од 300 метри, сместена на длабочина од околу пет метри.
Радиојаглеродните анализи покажуваат дека датира од околу 4700 година п.н.е., период кога нивото на Јадранското Море било околу пет метри пониско од денес.
Се претпоставува дека неолитската заедница изградила голема населба во ова изолирано подрачје користејќи огромни количини камен, иако причините за изградба на населбата одвоена од брегот засега се непознати, според Одделот за археологија на Универзитетот во Задар.
Тест-сондите открија дел од сувокамениот ѕид, а паралелно со предната страна на камениот ѕид се протега низа густо набиени дрвени столбови. Ова е само мал сегмент од сложената мрежа на структури што се протегаат низ целиот локалитет.
Истражувачите истакнуваат дека во последниве години, на источниот јадрански брег се откриени сè повеќе слични монументални неолитски структури. Се верува дека биле изградени од заедници свртени кон морето, веројатно со силна улога во поморската трговија.
Покрај тимот од Универзитетот во Задар, во истражувањето учествуваа и експерти од Меѓународниот центар за подводна археологија во Задар, како и вработени во Јавната установа за култура „Хан Врана“.
