Илон Маск се обрати на митинг на крајната десница во Лондон: „Или се бориш или умираш“

Илон Маск повика на „распуштање на парламентот“ и „промена на владата“ во Велика Британија, обраќајќи се пред толпата на митингот „Обединете го Кралството“ во Лондон, организиран од крајнодесничарскиот активист Стивен Јаксли-Ленон, познат како Томи Робинсон, „Гардијан“ .

Милијардерот Маск, сопственик на Платформата „Икс“, кој се јави преку видео врска и разговараше со Робинсон додека илјадници луѓе гледаа и слушаа, исто така се побуни против „разбудениот вирус“ и им рече на толпата дека „насилството доаѓа“ и дека „или се бориш или умраш“.

„Навистина мислам дека мора да има промена на владата во Британија. Не можете – немаме уште четири години, или кога и да се следните избори, предолго е. Нешто мора да се направи. Парламентот мора да се распушти и мора да се одржи ново гласање“, рече Маск.

Ова не е прв пат Маск да се меша во британската политика. Тој се вклучи во вербална расправија со британската влада околу регрутирањето во банди, а го критикуваше и Законот за онлајн безбедност од 2023 година, нарекувајќи го законот закана за слободата на говорот.

Тој имаше топол однос со Најџел Фараж, па дури имаше и гласови дека можеби ќе упати донација на својата партија пред шефот на Тесла да побара отпуштање на шефот на „Реформ УК“ за време на расправијата околу неговата поддршка за Робинсон.

„Мојот апел е до британскиот здрав разум, кој е внимателно да се погледне околу себе и да се каже: „Ако ова продолжи, во каков свет ќе живеете?“ Или се борите или умирате, тоа е вистината, мислам“, рече Маск во скандалозен говор од кој не би се засрамиле ниту во Берлин кон крајот на 1930-тите.

Маск, исто така, им рече на толпата дека „левицата е партија на убиството“, осврнувајќи се на смртта на Чарли Кирк.

„Има толку многу насилство кај левицата, нашиот пријател Чарли Кирк беше убиен ладнокрвно оваа недела, а луѓето од левицата отворено го слават тоа. Левицата е партија на убиството и го слави убиството. Мислам, да се прашаме за момент, ние се справуваме со нив“, рече Маск.

Тој, исто така, го критикуваше она што го нарече разбуден вирус, велејќи дека одлуките за унапредување треба да се базираат на заслуги, а не на „дискриминација врз основа на пол, религија, која било раса или нешто друго“.

„Голем дел од она што се случува во „разбудениот ум“ е всушност суперрасистички, суперсексистички и често антирелигиозен, но само антихристијански, како зошто антихристијански? Тоа е неправедно… тоа треба да биде сè што е важно, вирусот на разбудениот ум, како што го нарекувам јас, се спротивставува на сето тоа“, рече Маск.

Околу 110.000 луѓе учествуваа на уличниот митинг на крајната десница, во она што се смета за еден од најголемите националистички настани во последниве децении. Демонстрантите се соочија со околу 5.000 антирасистички контрапротестанти. На митингот беа запалени и палестински знамиња и беше покажана поддршка за Израел и неговиот геноцид во Газа.

Покрај Маск, на настанот присуствуваа и гости како Кејти Хопкинс и францускиот крајно десничарски политичар Ерик Земур.