Иако топлотниот бран почна да попушта: Европа погодена од пожари, суши и бури

Пожарникарите, поддржани од 30 авиони, денес се обидуваа да го стават под контрола големиот шумски пожар во североисточна Шпанија.

Повеќе од 1.000 луѓе беа евакуирани поради пожарот.

Голем пожар во регионот Арагон се прошири на повеќе од 12.000 хектари, а околу 300 припадници на воените единици за итни случаи и неколку хеликоптери учествуваат во неговото гаснење.

Метеоролошката служба на Шпанија предупреди дека температурите повторно ќе се зголемат од сабота, и дека во делови од Андалузија и Кастиља-Ла Манча следната недела би можеле да достигнат помеѓу 42 и 44 степени Целзиусови. Во исто време, беше издадено предупредување за екстремен ризик од шумски пожари поради приливот на топол и сув воздух од Северна Африка.

Пожарникарите се борат и со пожари во близина на Мадрид и во покраината Гвадалахара, каде што изгореа околу 1.500 хектари, а како превентивна мерка беше евакуиран и летен камп. Само пред една недела, во пожар во Алмерија загинаа најмалку 13 лица.

Високите температури и повторувачките топлотни бранови ја исушија вегетацијата низ цела Европа, зголемувајќи го ризикот од пожари, суши и штети во земјоделството. Научниците голем дел од екстремните временски услови ги припишуваат на климатските промени.

Според Ројтерс Климат Монитор, просечната максимална температура во Западна Европа денес била околу 27,5 степени Целзиусови, 4,2 степени над просекот за 17 јули од 1961 до 1990 година.

Во Франција, сушата се влоши од крајот на мај, додека високите температури предизвикуваат проблеми и за енергетскиот сектор. Електрана на гас на југот од земјата се соочува со можно затворање поради топлите мориња што го отежнуваат ладењето на електраната. Во Германија, ниските нивоа на водата на Рајна го отежнаа превозот и ги зголемија трошоците за транспорт, иако неодамнешните врнежи од дожд донекаде ја подобрија ситуацијата.

Во делови од Европа каде што поминаа топлотни бранови, тие беа заменети со силни бури. Во Франција и Германија, три лица загинаа поради бурите. Во централна и источна Франција, две лица загинаа од паѓање дрвја, додека во германската покраина Баден-Виртемберг, едно лице загина од гром.

Моќна бура од суперќелии ја погоди областа околу Штутгарт, носејќи силни ветрови и град со големина до пет сантиметри. Возачите се засолниле под надвозници за да се заштитат од бурата.

Во североисточна Германија, пожарникарите сè уште се борат со пожар во Националниот парк Мириц, кој гори речиси една недела. Нивната работа е отежната од присуството на неексплодирана муниција на поранешен воен полигон.

Поради високиот ризик од пожари, зголемени мерки се воведени и во пошироката област на Атина, каде што беспилотни летала со термални камери ги следат шумите, додека цистерни со вода се распоредени во близина на камповите.

Светската здравствена организација предупреди дека Европа се соочува со уште еден смртоносен топлотен бран, велејќи дека речиси 10.000 смртни случаи повеќе од вообичаеното се регистрирани за време на топлотниот бран кон крајот на јуни. Организацијата ги повика владите да ја третираат екстремната топлина како закана по здравјето, а не само како метеоролошка.