И старењето на мозокот може да се забави: Танцувајте, цртајте и играјте страгиски видео игри

Креативните активности, како што се танцувањето, музиката, цртањето и играњето сложени видео игри, не само што можат да го подобрат здравјето на мозокот, туку можат и да го забават неговото стареење, покажува нова студија.

Како што објавува порталот Medical News Today, истражувачите откриле дека луѓето кои долго време учествуваат во креативни активности имаат мозоци кои изгледаат „помлади“ од нивната вистинска возраст.

Студијата, објавена во списанието Nature Communications, анализирала податоци од повеќе од 1.400 учесници од 13 земји, вклучувајќи невровизуелизациски скенирања на мозокот.

Меѓу учесниците биле експерти за танго, музичари, визуелни уметници и играчи на стратешки видео игри.

„Креативните и уметничките активности – како што се танцување, музика, цртање или играње сложени стратешки видео игри – комбинираат многу работи што се добри за мозокот: тие бараат ментален напор, емоционален ангажман, честа социјална интеракција и прецизна координација на движењата“, објаснува д-р Анета Бжежичка, психолог и раководител на Центарот за неврокогнитивни истражувања на Универзитетот SWPS во Полска.

Истражувачите користеле таканаречени „мозочни часовници“, алгоритми кои ја проценуваат возраста на мозокот врз основа на електричната активност. Ако проценетата возраст на мозокот е помала од вистинската возраст, тоа значи дека мозокот старее побавно.

„Кај долгогодишните експерти за танго, музика и уметност, како и кај играчите на стратешки видео игри, мозокот е во просек од 4 до 7 години помлад отколку кај врсниците од ист пол, возраст и образование“, додава Бжежичка.

Дури и пократкото ангажирање во креативни активности може да донесе резултати. Во помала студија, учесниците кои никогаш порано не играле StarCraft II завршиле околу 30 часа обука, што ја намалило нивната проценета возраст на мозокот за околу три години. Во исто време, тие ги подобрија своите перформанси во игрите и распонот на внимание, додека контролната група не покажа никаква промена.

Експертите истакнуваат дека креативноста го поттикнува мозокот да размислува апстрактно и да развива нови начини за решавање проблеми, што класичните вештини како што се математиката или учењето факти не го овозможуваат во иста мера.

„Не мора да бидете експерт – дури и цртањето со прсти или свирењето на едноставен инструмент може да биде корисно за мозокот“, објаснува д-р Рафаел Валд, невропсихолог од Соединетите Американски Држави.

Д-р Меган Глин, клинички невропсихолог, додава дека ваквите активности се важни од млада возраст бидејќи помагаат во градењето на когнитивната отпорност и „мозочната резерва“, што може да помогне во одложувањето на проблемите со меморијата, вниманието и независноста во староста.

За оние кои сакаат да започнат со креативни активности, експертите препорачуваат да се фокусираат на она што навистина го уживаат.

„Пронајдете активности што ве забавуваат и мотивираат – музика, танцување, цртање или било што друго, и започнете полека. Клучот е активностите да бидат забавни, а не обврска, за да станат одржливи и корисни за мозокот“, пренесе „О21.