Хрватска го менува начинот на наплата на патарини

Хрватското Министерство за море, транспорт и инфраструктура има намера да предложи нов Закон за наплата на патарина, со кој би се исклучила можноста за плаќање патарина во готово и би се вовела обврска за користење уред во возилото за плаќање патарина за сите товарни возила и мотоцикли.

Владата во Националниот план за закрепнување и отпорност предвидела воведување на електронски систем за наплата на патарина.

„Гореспоменатата електронска наплата на патарина се базира на одбрани технологии (а не на сите технологии дозволени со Директивата 2019/520 и Законот за патишта), ја исклучува можноста за плаќање патарина во готово и воведува обврска за користење уред во возилото за плаќање патарина за сите товарни возила и мотоцикли, што ќе овозможи слободен проток на сообраќај, без возилата да застануваат за да платат патарина. За да се обезбеди слободен проток на сообраќај, потребно е да се регулира прашањето за следење на плаќањето патарина“, се наведува во образецот, кој е достапен за јавен увид до 15 октомври.

Како што се нагласува, новиот закон за наплата на патарина за прв пат ќе воспостави единствен електронски систем за наплата на патарина на целата автопатска мрежа во Хрватска.

„Промената што се постигнува е нов електронски систем за наплата на патарина во Република Хрватска, базиран на слободен проток на сообраќај, со микробранова технологија на фреквенција од 5,8 GHz и технологија за автоматско препознавање на регистарски таблички. Законот ќе ја исклучи можноста за плаќање во готовина за користење на автопатот, што следствено ќе ги намали оперативните трошоци за наплата на патарина. Сите товарни возила и мотоцикли ќе бидат обврзани да користат уред во возилото за плаќање на патарина. Лесните возила до 3,5 тони корисен товар ќе имаат можност да изберат помеѓу користење уред во возилото за електронска наплата на патарина и регистрација во системот за наплата на патарина за автоматско препознавање на регистарски таблички“, се наведува во образложението, а пренесува Тпортал.