Сè поголем број земји од Европската Унија се соочуваат со недостиг на лекови. Ревизијата на ЕУ минатиот месец откри дека недостигот е „хронична главоболка“ низ цела Европска Унија. Нејзините 27 земји пријавија критичен недостиг на 136 лекови помеѓу 2022 и 2024 година, вклучувајќи антибиотици и лекови што се користат за лекување на срцев удар, соопшти Европскиот суд на ревизори (ECA). Критичниот недостиг значи дека нема алтернатива достапна на пазарот.
Белгија пријави најмногу случаи до Европската агенција за лекови (EMA) во 2024 година, со повеќе од десетина критични случаи. Причината делумно лежи во проблемите со синџирот на снабдување и преголемата зависност на Европа од Азија за клучни компоненти на лековите, соопшти ECA. Пониските цени на лековите се резултат на снабдувањето од Азија, што значи дека азиските производители сега ја снабдуваат ЕУ со 70 проценти од активните фармацевтски состојки што ѝ се потребни, според студијата цитирана во извештајот на ECA.
Зависноста е особено изразена во случај на лекови против болки, како што се парацетамол или ибупрофен, и лекови кои се во критичен недостиг во последниве години, вклучувајќи некои антибиотици и салбутамол, лек за астма што се продава под брендот Ventolin. Сепак, виновна, исто така, е и неефикасноста на внатрешниот пазар на ЕУ. Цените на лековите варираат во рамките на блокот бидејќи националните власти преговараат поединечно со производителите, објасни Оливие Делаер, извршен директор на Febelco, големопродажен дистрибутер кој снабдува околу 40 проценти од белгиските аптеки.
– Последицата од ова е што производителите имаат тенденција да испорачуваат повеќе во земјите што плаќаат повеќе, а само маргинално во оние што постигнале пониски цени во преговорите, со цел да се избегне препродажба на тие лекови за профит – рече тој.
Покрај тоа, ECA објави дека повеќето лекови имаат одобренија на национално ниво, па пакувањето значително варира меѓу земјите, што ја прави трговијата во рамките на ЕУ „поскапа и посложена“. Ова предизвикува таканаречени локални недостатоци, кога производот не е достапен во една земја од ЕУ, туку може да се најде веднаш преку границата во друга земја, рече Делаер од Febelec, а пренесува Вечерни.ба
