Хорот „Фрида од Македонија“ и младата Бобана ја одушевија публиката

– Со своите раскошни таленти, Бобана ќе ни биде зачетокот на новата генерација Фриди. Очекувам од наредната сезона, благодарение на таа страст за сцената и на талентот за пеење што го има, да направиме уште една група млади Фриди на кои сцената ќе им биде природна средина, посочи по концертот Сузана Турунџиева, основач, раководител и диригент на хорот со кој завчеравечер во Музејот на македонската борба за самостојност настапи и младата талентирана Бобана Богдановска-Андреска. Концертот се одржа во рамките на Есенски музички свечености

Со бурни аплаузи и со барање за бис во неделата вечер во Музејот на македонската борба за самостојност беше награден извонредниот концерт на женскиот хор „Фрида од Македонија“, а големи симпатии од публиката доби младата талентирана Бобана Богдановска-Андреска, која со својата драмска точка и игра му се придружи на хорот надополнувајќи ја магичната атмосфера во полната сала. Под водство на Сузана Турунџиева, вокален солист и музички педагог, која е и основач, раководител и диригент на хорот, членките на „Фрида од Македонија“, на  голема радост на присутните, ги изведоа безвременските македонски нумери од 50-тите и од 60-тите години. Концертот насловен „Фрида Музикотерапија“ кој се одржа во рамките на 25. „Есенски музички свечености“ (25 октомври –10 ноември) и овој пат беше музички празник за публиката, а младата Бобана, пак, беше вистинска кралица на сцената.

– Со сите нејзини раскошни таленти Бобана ќе ни биде зачетокот на новата генерација Фриди. Очекувам од наредната сезона, благодарение на таа страст за сцената и на талентот за пеење што го има, да успееме да направиме уште една група млади Фриди, на кои сцената ќе им биде природна средина, посочи по концертот Турунџиева.

Бобана Богдановска-Андреска играше, но и настапи со драматизација на познатата македонска народна песна „Ој Јано, Јано“, како Јана од сегашноста.

– Ако се мислите која сум, јас не сум Јана од минатото, јас сум Јана од сегашноста растоварена од лошата среќа, стереотипи, догми и од неубав к’смет. Јас сум Јана, која храбро чекори кон иднината и сама си ја пишувам својата судбина, многу посветла од онаа на Јана во минатото, кажа младата Бобана во својот настап, за кој драматизација напиша Турунџиева. Нејзината изведба предизвика воодушевување и огромен аплауз кај присутната публика.

Инаку, пред присутните беа изведени и две познати, омилени песни на Фрида Кало, стари 90 години.

– Ни беше мило да ги „воскреснеме“ бидејќи веќе подолго време никој не ги пее на овие простори. За нас, изведбата на овие нумери беше предизвик, посочи Турунџиева.

Инаку, концертот започна и заврши со химната на хорот, насловена „Песната е лек“, снимена пред пет месеци, која публиката ја пееше во еден глас со Фридите. Имаше и солистички настапи во двете групи на хорот, а членките го дадоа својот максимум, поради што беа вратени и двапати на бис.

Аматерскиот женски хор „Фрида“, пак, е формиран во октомври 2023 година. Хорот функционира во 2 секции, односно групи составени од по 60-тина хористки аматери, со големо хорско искуство. Сите нивни настапи се проследени со воодушевување, па така, и за овој концерт во рамките на фестивалот „Есенски музички свечености“ долго ќе се зборува.

– Во 2025 година, фестивалот гордо го одбележува своето јубилејно 25. издание, потврдувајќи ја својата мисија да биде симбол на есенската музичка култура и неизоставен дел од културниот идентитет на градот. Секоја есен, во периодот од октомври до ноември, Скопје станува сцена на врвни музички доживувања што ги обединуваат класичната, камерната, џез и современата музика, посочуваат од Дирекцијата за култура и уметност, организатори на фестивалот чие основање е во 1999 година. (Д. Т.)

Фото: П. Стојановски