Хаос во бугарскиот парламент: За време на жестоката расправа за усвојувањето на еврото, пратениците се степаа/ВИДЕО

За време на вчерашната жестока расправа за планираното воведување на еврото пратениците во бугарскиот парламент буквално се степаа, а атмосферата ескалира и на софиските улици.

Во центарот на инцидентот беше претставникот на крајнодесничарската партија „Преродба“ (Вазраждане), Цончо Ганев, кој среде пленум го оттурна претставникот на партијата „Продолжуваме со промените“, Јавор Божанков. Сето ова се случи додека членовите на „Преродба“ ја блокираа собраниската говорница, протестирајќи против влезот на Бугарија во еврозоната.

Пратениците од „Преродба“ вееја транспаренти на кои пишуваше „Не на еврото“ и „Да за нашиот лев“, а тензиите експлодираа кога пратениците евро-застапници објавија дека Бугарија официјално ќе стане 21-та членка на еврозоната на 1 јануари 2026 година.

Надвор од парламентот ситуацијата не беше помирна. Илјадници демонстранти, организирани од проруската партија „Преродба“, се собраа пред зградата, носејќи бугарски и руски знамиња и извикувајќи слогани како „Не на евроколонијализмот!“ и “Левот останува!”

Претседателката на Европската комисија Урсула фон дер Лајен рече дека еврото ќе ја зајакне бугарската економија, ќе ја зголеми трговијата, инвестициите и ќе донесе повеќе квалитетни работни места.

Но, лидерот на „Преродба“, Костадин Костадинов не штедеше зборови. Тој ги нарече пратениците проевропски „јаничари“ и предавници на народот, што доведе до тоа многу пратеници од проевропската партија да ја напуштат салата. Костадинов се закани дека секоја влада што ќе го протурка еврото „ќе плати сурова цена“.

Премиерот Росен Јелиазков на социјалните мрежи го нарече денот кога Бугарија доби зелено светло за еврото „историски“. И поранешниот премиер Кирил Петков рече дека државата го чекала овој момент 18 години.

Лидерот на најголемата опозициска партија ГЕРБ, Бојко Борисов, ги исмеа демонстрантите, нарекувајќи ги „оние кои сакаат Бугарија да остане надвор од клубот на развиените нации“ и го обвини Петков дека не придонел ништо за целиот процес.