Хантер Бајден „завојува“ со Џорџ Клуни!

Во интервјуа објавени една година откако Џо Бајден се откажа од трката за реизбор, неговиот син Хантер го нападна актерот Џорџ Клуни затоа што водеше јавна кампања во која го повикуваше тогашниот претседател да се откаже од трката.

„Е*и го. И сè во врска со него“, рече помладиот син на Бајден во интервју полно со вулгарности со независниот новинар Ендру Калахан, кој има три милиони следбеници на YouTube.

„Дали навистина мислите дека во средна Америка, на тој гласач во Грин Беј, Висконсин, му е гајле што мисли Џорџ Клуни за тоа за кого треба да гласа?“ рече Хантер Бајден во подкастот со Џејми Харисон, поранешен претседател на Демократскиот национален комитет.

Клуни беше еден од првите истакнати демократи кои јавно го повикаа Џо Бајден да се откаже од претседателската трка, само три месеци пред изборите. На 81 година, Бајден се соочуваше со растечки сомнежи во сопствениот табор по катастрофалната дебата со Доналд Трамп.

„Го сакам Џо Бајден. Но, ни треба нов кандидат“, беше насловот на есејот на Клуни, објавен во Њујорк Тајмс на 10 јули 2024 година. Актерот и продуцент, добитник на Оскар, раскажа како го видел претседателот на холивудска хуманитарна акција еден месец претходно.

„Го сметам за пријател и верувам во него… Тој доби многу од битките со кои се соочи во последните четири години. Но, единствената битка што не може да ја добие е битката против времето“, напиша Клуни. Помалку од две недели подоцна, на 21 јули, претседателот го објави своето повлекување од трката.

Хантер Бајден луто се присети на настаните што донесоа крај на децениската политичка кариера на неговиот татко.

„Зошто, по ѓаволите, морам да ве слушам? Какво право имате да газите врз човек кој посветил 52 години од својот проклет живот на служење на оваа земја и да одлучите дека вие, Џорџ Клуни, ќе објавите оглас на цела страница во проклетиот Њујорк Тајмс“, рече тој во интервјуто кај Калаган.

Хантер Бајден е американски адвокат и бизнисмен, роден во 1970 година во Вилмингтон, Делавер. Тој е син на Џо Бајден, поранешниот претседател на САД, и неговата прва сопруга, Неилија. Како млад човек, преживеал сериозна сообраќајна несреќа во која загинале неговата мајка и сестра, а тој и неговиот брат Бо биле сериозно повредени.

По дипломирањето на Универзитетот Џорџтаун и Правниот факултет на Јеил, ја изградил својата кариера во банкарската компанија MBNA America, каде што брзо се искачил до извршен потпретседател, и работел во владата на САД под претседателот Бил Клинтон.

Подоцна станал лобист и влегол во бројни инвестициски и деловни проекти, вклучително и членство во одборите на железничката компанија „Амтрак“ и украинската енергетска компанија „Буризма холдингс“. Токму бизнисот со „Буризма“ предизвикал бројни сомневања и политички скандали, но никогаш не биле пронајдени докази за кривични дела поврзани со Џо Бајден.

Приватниот живот на Хантер Бајден е обележан со долгорочни проблеми со зависноста од алкохол и дрога, афери, развод и разни скандали што дополнително го зголемија јавниот интерес, особено додека неговиот татко беше потпретседател и претседател на Соединетите Американски Држави. Тој беше и предмет на судска постапка: во 2024 година, беше осуден за три федерални прекршоци поврзани со поседување оружје и се изјасни за виновен за даночни прекршоци.

Во декември 2024 година, неговиот татко, тогашниот претседател, го помилува за сите злосторства извршени од 2014 до 2024 година. Хантер Бајден е често предмет на политички напади и контроверзии, како и на вниманието на јавноста поради неговиот бурен приватен и професионален живот.

Хантер Бајден: Апчињата за спиење се виновни за неуспехот на мојот татко