Хамас нема контрола на 80 отсто од Појасот Газа, па таму сега владеат вооружени банди и кланови, тврди офицер на оваа вооружена група

Палестинската вооружена група Хамас изгубила 80 проценти од својата контрола на Појасот Газа, па овој вакуум на власт сега го пополнуваат вооружени кланови, тврди поранешен висок офицер на Хамас за „Би-би-си“.

Потполковникот со кој контактирал британскиот сервис веќе не е на функција во Хамас откако бил ранет уште во првата недела од војната што почна со нападот на Хамас врз Израел на 7 октомври 2023 година, а изјавата ја дал во гласовна порака со гаранција на анонимност. Според него, командниот и комуникацискиот систем на Хамас се распаднал по месеците израелски напади со кои биле уништени политичкото, военото и безбедносното раководство.

– Да бидеме реални, од безбедносната структура речиси ништо не остана. Поголемиот дел од раководството, околу 95 проценти, е мртво… Сите клучни луѓе се убиени. Што точно сега го спречува Израел да ја продолжи војната?, вели тој во пораката.

Додава дека логично, војната мора да оди до крај.

– Сите услови се исполнети: Израел има предност, светот молчи, арапските режими молчат, криминалните банди се насекаде, општеството се распаѓа, посочува анонимниот соговорник на „Би-би-си“.

Уште во септември минатата година тогашниот израелски министер за одбрана изјави дека Хамас, како воена формација, повеќе не постои и дека сега дејствува преку герилска војна. Според потполковникот, Хамас се обидел да ги обнови своите структури за време на 57-дневното примирје, но откако тоа заврши во март, Израел ги продолжи нападите врз останатата команда на Хамас.

– Кога зборуваме за безбедноста, нека биде јасно – таа целосно пропадна. Ја нема. Луѓето го ограбија Ансар, најсилниот безбедносен комплекс на Хамас, од кој групата владееше со Газа, вели тој во пораката.

Според него, ограбено е сè: од канцелариската опрема, душеците, до чајот и лимените плочи и никој не реагирал затоа што нема политика, ниту безбедност. Офицерот наведува дека поради вакуумот на моќ, вооружени банди и кланови се појавуваат насекаде, а никој не реагира ни кога убиваат, а ако некој се обиде сам да организира отпор против крадците, ќе биде бомбардиран од Израел во рок од половина час.

– Безбедноста е нула. Контролата на Хамас е нула. Нема раководство, нема команда, нема комуникација. Платите доцнат, а кога доаѓаат, едвај се употребливи. Некои умираат само обидувајќи се да ги подигнат. Тоа е целосен колапс, вели анонимниот соговорник.

Тој дава и шокантна изјава дека еден водач на клан добил оружје од Израел. Посочува дека во вакуумот на моќ се појавиле шест вооружени групи поврзани со моќни локални кланови, главно на југот на Газа. Тие имаат пристап до пари, оружје и борци. Една таква група е предводена од Џасер Абу Шабаб, чии активности го привлекоа вниманието на палестинската управа со седиште во окупираниот Западен Брег. Офицерот тврди дека Хамас објавил висока награда за главата на Абу Шабаб, плашејќи се дека тој може да стане симбол околу кој ќе се соберат сите непријатели на Хамас. Извори во Газа велат дека Абу Шабаб се обидува да се координира со други вооружени групи за да формира заеднички совет со цел да се собори Хамас.

– Седумнаесет години Хамас создаваше непријатели насекаде. Ако некој како Абу Шабаб успее да се позиционира како обединувач на тие сили, тоа би можело да биде почеток на нашиот крај, посочува соговорникот на „Би-би-си“.

Додека Газа тоне подлабоко во бездржавност, а цели населби потпаѓаат под власта на вооружени кланови, ова што го зборува потполковникот значи дека Хамас се соочува не само со израелски напади туку и со растечка закана однатре.