Во Хаг, во пресрет на Самитот на НАТО што ќе се одржи следната недела, се зајакнува безбедноста, се поставуваат огради како дел од суперстрогите безбедносни мерки во големата воено-полициска операција „Портокалов штит“, која во голема мера го наруши животот на половина милион жители.
Делови од нормално мирниот Хаг, каде што животот е релаксиран и каде што генералниот секретар на НАТО Марк Руте, како премиер на Холандија, се возеше со велосипед до работа и попат јадеше јаболка, се претвораат во „воена тврдина“.
Терасата на популарниот ресторан Берлаж во центарот на градот, кој вообичаено е раздвижен со луѓе за време на брзањето за ручек, е речиси празна.
Паркинг местата се блокирани со безбедносни огради, канцелариските работници се испратени на работа од дома, а линиите на јавниот превоз се пренасочени.
Градот кој се рекламира како светски центар за мир и правда поради тоа што во него се сместени меѓународни судови, се претвора во град на безбедносни мерки за средбата на 24-25 јуни, лидерите на 32 земји-членки на Алијансата, вклучувајќи го и американскиот претседател Доналд Трамп.
Самитот се одржува во време кога растат глобалните геополитички тензии и конфликти, а во, како што велат властите „најголемата безбедносна операција досега спроведена во Холандија“, блокирани се делови од градот, улици и патишта, а се затвора и воздушниот простор.
Барикадите и металните огради околу Светскиот форум, каде што ќе се одржи Самитот, се дел од мерките кои се шират и надвор од Хаг.
Околу 27.000 полицајци – половина од вкупниот број во Холандија – ќе бидат на должност за време на Самитот, заедно со повеќе од 10.000 војници.
Воената полиција ќе ги штити делегациите. Воените сили на НАТО веќе ја набљудуваат областа, фрегати ќе патролираат по Северното Море на чиј брег е Хаг и неговата најголема плажа во населбата Шевенинген, борбени авиони Ф-35 и хеликоптери Апачи ќе крстосуваат по небото, а противвоздушните системи ќе бидат во состојба на готовност.
Конвоите со лидерите ќе минуваат во придружба на воена полиција по затворените автопати од аеродромот до нивното сместување.
Додека цивилните беспилотни летала се забранети од воздушниот простор околу клучните локации, полициските и воените беспилотни летала ќе кружат каде и да се соберат лидерите.
Редовната и полицијата за разбивање демонстрации ќе биде присутна на неколку најавени протести, а демонстрантите настојуваат да го блокираат и автопатот кон градот.
Според програмата на средбата, лидерите на земјите од НАТО во вторник ќе вечераат со холандскиот крал Вилем Александар во неговата палата во блиската шума, а следниот ден се очекува на Самитот да се договори за зголемување на трошоците за одбраната.
Додека лидерите вечераат со кралот, министрите за надворешни работи и за одбрана на земјите од НАТО ќе подготвуваат договори за различни прашања, вклучувајќи ја и руската војна во Украина.
Самитот ќе се одржи во конгресниот центар и театарот во близина на зградата каде што порано беше Трибуналот на ОН за поранешна Југославија, каде што лидерот на босанските Срби Радован Караџиќ и неговиот воен командант Ратко Младиќ и други беа осудени за воени злосторства, истакнува АП.
Во близина е и Организацијата за забрана на хемиско оружје, добитник на Нобеловата награда, како и полициските и судските служби на ЕУ. На истата улица е Меѓународниот кривичен суд, а во близина е и Меѓународниот суд на правдата, чии судии решаваат спорови меѓу државите.
Многу граѓани кои живеат во тој крај нема да можат да гледаат како минуваат службените лица, а историскиот Гастробар Берлаж, каде што локалното население, домашните и странските љубители на уметноста и дипломатите сакаат да се среќаваат за храна и пијалоци, ќе ги затвори вратите и сончевата тераса една недела, а повторно ќе се отвори кога ќе заминат лидерите на НАТО.
