Непоразениот поранешен шампион на УФЦ, а сега тренер, Хабиб Нурмагомедов (37), даде свој коментар за отпуштањето на Чаби Алонсо од клупата на Реал Мадрид.
Само еден ден по поразот од Барселона во шпанскиот Суперкуп, „кралскиот клуб“ го отпушти Алонсо од клупата на Реал, иако бележеше добри резултати. Сепак, очигледно, ситуацијата во соблекувалната не била во најдобар ред поради „разгалените деца“, кои му го свртеа грбот на Алонсо. Тоа кулминираше со отказ за него.
- Ако влезеш во вежбалница или излезеш на терен, не е важно дали се борачи или фудбалери, како тренер, ти си главен и лидер. Но, ако во твојот тим постојат момци што не ги почитуваат твоите збор и барање, тогаш дефинитивно не си на истиот пат. Верувам дека Алонсо е меѓу тројцата најдобри тренери во модерната ера. Ако не функционираше тимот со него, тогаш требаше да се сменат играчите, а не тренерот. Апсолутно сум сигурен дека ниту еден тренер не би се справил со таков кадар во Реал Мадрид. Мора да се ослободите од проблематичните играчи. Пред една година го молеа, а сега го отпуштија поради разгалените деца. Чаби, ти си најдобар – напиша Нурмагомедов на социјалните мрежи.
Инаку, минатата година, поранешниот ММА-борач откри дека е навивач на Реал од 1998 година.
- Уште од мал сум навивач на Реал Мадрид. Од 1998 година, кога го гледав првото финале на Лигата на шампионите. Тогаш Предраг Мијатовиќ постигна гол против Јувентус (во победата од 1:0) – рече Хабиб по финалето на Лигата на шампионите во 2025 година.
Реал Мадрид го отпушти тренерот Чаби Алонсо (44) во понеделникот. Алваро Арбелоа (42), исто така поранешен играч на Реал, беше назначен за негов наследник. Алонсо го водеше Реал на 34 натпревари, забележувајќи 24 победи, четири нерешени и шест порази.
„Атлетик“ напиша дека причина за заминувањето било несогласувањето со клучните играчи, Винисиус Жуниор, Федерико Валверде и Џуд Белингам, кои имале проблеми со неговиот тактички пристап и со неговиот стил на управување со тимот.
Шпанската радиостаница „Ла Сер“ тврди дека по заминувањето од Реал, Алонсо рекол: „Не можете да им дадете толку многу моќ на играчите. Невозможно е да владее тренерот во соблекувалната ако клубот е секогаш на страната на играчите“.
