Гвардиола принуден да продаде пет фудбалери

Откако не успеа да освои ниту еден трофеј минатата сезона, Манчестер Сити беше многу активен за време на летниот преоден рок и купи многу играчи.

Новиот спортски директор Уго Вијана ги донесе Рајан Черки, Рајан Аит-Нури, Тиџани Рајндерс, Свере Нипан и голманите Џејмс Трафорд и Маркус Бетинели.

Играчи како Кајл Вокер, Кевин Де Бруин и Скот Карсон го напуштија клубот, додека младите Јан Куто и Максимо Пероне се позајмени.

Сепак, Манчестер Сити сè уште има 30 играчи во првиот тим, и како што тврди Сајмон Малок од „Мирор“, тие треба многу брзо да реагираат и да направат пет трансфери за да ги исполнат правилата на УЕФА.

Во Премиер лигата, поради различно правило за домашните играчи и играчите под 21 година, Манчестер Сити мора да направи само една продажба.

Клубовите не смеат да имаат повеќе од 25 играчи на својата А-листа за Лигата на шампионите, па затоа е јасно дека некои играчи ќе мора да бидат продадени ова лето, поточно до 1 септември.

Џек Грилиш, Џејмс МекАти, Калвин Филипс и Стефан Ортега се меѓу играчите кои се достапни за останатите клубови.

Евертон се обидува да го заврши договорот за позајмица на Грилиш, додека МекАти би можел да оди во Нотингем Форест или Ајнтрахт Франкфурт.

Голманот Ортега би можел да се врати во Бундеслигата, додека Филипс најверојатно подготвува враќање во Лидс Јунајтед.

Младиот Бразилец Витор Реис замина во Џирона на позајмица, а таму би можеле да бидат позајмени и Ечевери и Нипан.