„Гугл„ ја објави причината: „Плеј Стор“ изгуби половина од своите апликации

Понудата во „Гугл плеј стор“ (Google Play Store) е значително намалена. Помеѓу почетокот на 2024 година и април 2025 година, бројот на достапни апликации за Android падна од 3,4 милиони на 1,8 милиони – што е пад од 47 проценти. Ова доаѓа од неодамнешната анализа на Appfigures, како што објави Techcrunch.

За разлика од општиот тренд на пазарот, ова е намерна чистка спроведена од Google. За споредба: App Store на Apple забележа благ пораст од 1,6 милиони на 1,64 милиони апликации во истиот период.

Во јули 2024 година, Google објави заострување на барањата за квалитет на својата платформа. Наместо само да ги отстранува технички неисправните апликации, компанијата сега ги брише и оние со „ограничена функционалност и содржина“. Ова вклучува апликации само за текст, единечни PDF-датотеки или апликации со само една слика во заднина.

Исто така, отстранети се и апликациите кои не работеа по инсталацијата, се наведува понатаму. Google за Techcrunch потврди дека новите барања за квалитет значително придонеле за намалување на бројот на апликации.

Мерките исто така вклучуваат:

Подобрена проверка на идентитетот на програмерите

Задолжително тестирање на апликации за нови развојни сметки

Проширен рачен преглед за откривање на лажни содржини

Инвестиции во технологии за вештачка интелигенција за откривање закани

Резултатите се јасни: Google спречи објавување на 2,36 милиони апликации кои ги прекршиле упатствата. Исто така, блокираше повеќе од 158.000 равојни сметки кои се обидуваа да дистрибуираат штетни апликации.

Интересно, Appfigures забележа пад на бројот на апликации дури и пред официјалниот почеток на чистката во летото 2024 година. Во моментов нема официјално објаснување за ова.

Една од можните причини може да биде новото правило на ЕУ за „статус на трговец“, кое стапи на сила во февруари 2025 година. Тоа бара од програмерите да ги откријат нивното име и адреса. Иако Google не ја наведува оваа одредба како директна причина, таа можеше да придонесе за отстранување на бројни апликации од европскиот пазар.