Ѓубрето нема да се намали ако се намали времето во кое смее да се фрла

Од „Зелен хуман град“ реагираат на одлуката што ја донесе Советот на Град Скопје со која се забранува фрлање комунален отпад во контејнерите во периодот од 22:00 часот до 06:00 часот, а за непочитување следува парична казна од 50 евра.

Тие сметаат дека ѓубрето нема да се намали ако се намали времето во кое смее да се фрла.

– Очигледно е дека за новата градска администрација контејнерите повеќе загадуваат отколку индустријата, дека приоритетот е да се удри по џебот на граѓаните, наместо да се удри по мултимилионските титански загадувачи. Очигледно е дека не е приоритет што имаме илјадници болни од рак, што секоја година ни умираат 6.000 луѓе и што ни умира секое деветто бебе до 1 година од овие загадувачи. Очигледно не е приоритет нашето право на чист воздух загарантирано со Уставот на РМ. Очигледно е дека приоритетот на ВМРО-ДПМНЕ е да продолжат да го вртат истото орце преку 34 години – нагласуваат од „Зелен хуман град“.

Додаваат дека наскоро ќе зафалат инспектори за контрола на контејнери и ќе треба нови вработувања на нивните партиски кадри, кои, како што велат, ќе го цицаат градскиот буџет и буџетот на граѓаните, работејќи на тотални небулози од кои граѓаните немаат ама баш апсолутно никаква полза.

– А нашите бели дробови, кои не само што не се веќе ни бели, туку се и закиселени? Очигледно не се приоритет – јасни се од „Зелен хуман  град“.

Тие наведуваат дека со години бараат од Град Скопје да се одвојат средства за инспектори за животна средина и да се воведе трета смена на дежурни инспектори.

На сметка на тоа, како што истакнаа, Град Скопје го зголеми буџетот за истражување на мерки за аерозагадувањето и покрај 50. веќе поднесени про боно мерки од страна на Зелен хуман град, базирани на наука и потврдено дека функционираат и се веќе применети во загадени градови низ светот.

– Нема средства за мерни станици. Нема средства за трета смена инспектори за животна средина. Ама има средства за неколку десетици инспектори трета смена за контејнери – нагласуваат од „Зелен  хуман град“.

(А.П.)