Грета Тунберг по враќањето во Шведска изјави дека не била свесна дека некои од учесниците во поморската мисија „Флотила на слободата“, со која се обиде да ја пробие израелската блокада на Газа, претходно изразиле поддршка за Хамас и Хезболах.
Шведската климатска активистка слета во Стокхолм во вторник вечерта откако беше депортирана од Израел поради нејзиното учество во обидот за пробивање на блокадата на Газа со бродот Мадлин.
„Не сум слушнала за тоа и не знам што кажала таа личност“, изјави 22-годишната Тунберг за новинарите. Кога ја прашале зошто не се информирала за луѓето со кои патувала пред патувањето, таа одговорила: „Затоа што немав мобилен телефон“. Кога новинарите ѝ поставиле дополнителни прашања, таа реагирала луто: „Дали навистина треба да ги прашам сите што точно кажале за сè? Тоа би траело долго време“.
Кој бил на бродот со Грета?
Според израелски и британски извори, мисијата ја предводел Захер Бирави, за кого израелските власти тврдат дека е оперативец на Хамас. Бирави беше виден во друштво на поранешниот лидер на Хамас, Исмаил Ханија, и е на чело на организацијата Европски форум, која Израел ја прогласи за терористичка организација во 2021 година.
Еден од учесниците беше бразилскиот активист Тијаго Авила, кој присуствуваше на погребот на лидерот на Хезболах, Хасан Насралах, минатата година и јавно го изрази своето восхитување кон него на социјалните мрежи.
Забрането влегување во Израел 100 години
Тунберг и уште тројца активисти веднаш се согласија да бидат депортирани, додека осум членови на мисијата беа во израелски притвор. На сите членови на екипажот на „Мадлин“ им беше забрането влегување во Израел 100 години.
И покрај сè, Тунберг рече дека има намера повторно да патува во Израел и Газа, обвинувајќи ја израелската влада за „систематски геноцид“ и „изгладнување на повеќе од два милиони луѓе во Газа“.
На прашањето дали се плашела кога израелските сили го нападнале бродот, таа одговори: „Она што најмногу ме плаши е тишината додека се случува геноцид“.
