Грција во подготвеност поради можен грабеж на музеи

Грабежот на Лувр во Париз и можноста за сличен инцидент во еден од бројните и значајни музеи во Грција, ги ставаат надлежните органи во готовност.

Како што дознава весникот „Катимерини“, грчките министерства за внатрешни работи и култура планираат да го доверат чувањето на музеите, а можеби и на некои археолошки локалитети, на грчката полиција.

Според надлежните службеници, почнувајќи од следниот март, чувањето на непроценливите културни богатства ќе вклучува не само цивилни службеници на Министерството за култура, како што беше случај досега, туку и униформирани полицајци, пишува „Катимерини“. Оперативниот план ќе вклучува 300 специјални чувари кои наскоро ќе бидат интегрирани во грчката полиција.

Изворот објасни дека Министерството за внатрешни работи претходно планирало да вработи 600 нови специјални чувари за зајакнување на полициските служби. Сепак, по владина одлука и според една верзија, по препорака на Министерството за култура, беше одлучено вкупниот број на специјални стражари што ќе се приклучат на полицијата да се зголеми на 900, при што 300 од нив ќе бидат распоредени да ги чуваат музеите и археолошките локалитети. Новите специјални стражари ќе се приклучат на полицијата во февруари-март.

Во Грција, грабеж сличен на оној во Лувр се случи во 2012 година, кога сторител успеа да провали во Националната галерија и да украде три вредни уметнички дела, вклучувајќи ја и сликата на Пикасо. Истата година кога беше провалено во Галеријата, грабеж беше забележан и во Музејот на историјата на Олимписките игри во Античка Олимпија. Овој случај го открија и службеници од Службата за безбедност на Патрас, кои ја презедоа истрагата.