Гран при наградата на 38. Филмски фестивал во Херцег Нови во Црна Гора -Голема златна мимоза – му беше доделена на филмот „Диџеј Ахмет“ на режисерот Георги Унковски за, како што е соопштено, неговата способност да внесе нова виталност и емоции во наративот за созревање. Фестивалот во Херцег Нови се одржа од 23 до 29 август.
На затворањето на Филмскиот фестивал во Херцег Нови (ФФХН), жирито составено од Предраг Перишиќ – претседател, и членовите Есра Демиркиран, Маја Богоевиќ, Наташа Нинковиќ и Горчин Стојановиќ, го препозна филмот „Диџеј Ахмет“ како искрено истражување на првата љубов и товарот на традицијата.
„Георги М. Унковски раскажува приказна која е длабоко вкоренета во културата, а во исто време резонира универзално. Главниот лик (15-годишниот Ахмет) вложува напори да ги помири традицијата и модерноста, да ги исполни соништата на својот татко, но и сопствените – носејќи ни длабоко личен дискурс за пронаоѓање на сопствениот глас во свет кој се обидува да го замолчи. Го наградуваме овој филм за неговата способност да внесе нова виталност и емоции во наративот за растењето“, се вели во одлуката на жирито.
Наградата на режисерот Георги М. Унковски му ја врачи Стеван Копривица, професор, драматург, сценарист и уметнички директор на фестивалот.
Георги М. Унковски, пак, изјави: „Ова е мојот прв филм, се надевам дека не е и мојот последен. Ќе продолжиме да снимаме филмови дури и кога изгледа невозможно“.
Инаку, дебитантското долгометражно остварување на Унковски минатиот месец голем успех доживеа и на 31. Сараевски филмски фестивал каде доби три награди: Специјалната награда за перспектива на младите, наградата Синеуропа и Уникредит наградата на публиката. Со овие три признанија, „Диџеј Ахмет“ се вброи меѓу најнаградуваните и најистакнати филмови на овогодинешното издание на Сараевскиот фестивал.
Како што е познато, „Диџеј Ахмет“ македонска премиера ќе има на затворањето на 46. издание на Фестивалот на филмска камера „Браќа Манаки“ во Битола, што ќе се одржи од 20 до 26 септември.
