Граѓанската иницијатива „Поддржи го Кочани“ („Support Kocani“ЖЖ) попладнево соопшти дека е пристигната втората донирана пратка компресивна облека за повредените во пожарот што се случи на 16 март годинава. Од „Поддржи го Кочани“ информираат дека облеката веќе е доставена во Општата болница во Кочани.
Во оваа пратка се вклучени 43 парчиња компресивна облека, изработени по индивидуални мерки за 17 повредени лица. Облеката беше испорачана во Македонија во понеделник навечер, а веќе денес е доставена на Општата болница во Кочани.
Фактурата за оваа пратка, во износ од 283.802 денари, е целосно исплатена од страна на иницијативата „Поддржи го Кочани“. Ова е втора по ред испорака на компресивна облека што ја обезбедува иницијативата. Претходно, „Поддржи го Кочани“ целосно ја покри и првата пратка во вредност од 923.458 денари, со што вкупниот износ за двете набавки изнесува 1.207.260 денари, односно 23.560,37 евра – средства обезбедени исклучиво преку донации од хумани граѓани, фирми и поддржувачи од земјата и дијаспората.
Голема благодарност упатуваме до компаниите „Julius Zorn GmbH“ и „Health 2000“, кои што овозможија квалитетна и навремена медицинска помош за што поголем број повредени лица.
„Во време на болка, солидарноста е најголем лек. Никој нема да биде сам. Делата зборуваат многу погласно од зборови, а ние не застануваме – продолжуваме посветено и одговорно, сè додека постои потреба и сè додека има луѓе што веруваат во хуманоста,“ – порачаа од „Поддржи го Кочани“.
