Гостиварци ќе добијат бесплатен Интернет на јавните места. Гостивар е една од општините избрани на повикот WiFi4WB (вај-фај за Западен Балкан). Тоа е иницијатива што ќе донесе бесплатен и брз Интернет во јавните простори.
– Нашите граѓани ќе имаат можност да се поврзат полесно, побрзо и без трошоци. Тоа се придобивките од оваа иновација што ја зајакнува нашата врска со дигиталниот свет – велат од Општината.
Оваа иницијатива се спроведува преку програмата „EU4Digital Action“, која е поддржана од Европската Унија и од германското сојузно Министерство за економска соработка и развој (BMZ), а ја спроведува германската Агенција за меѓународна соработка (GIZ).
