Горан Ѓорѓиев назначен за регионален директор на Европскиот центар за поддршка при Светската извидничка организација

Сојузот на извидници на Македонија информира дека Горан Ѓорѓиев е назначен за регионален директор на Европскиот центар за поддршка при Светската извидничка организација. Одлуката е донесена од генералниот секретар на организацијата, по конкурентен меѓународен процес на селекција меѓу кандидати од цела Европа и пошироко.

Ѓорѓиев има повеќе од 15 години искуство од стратешкото лидерство, организацискиот развој и од младинската работа со извидниците на национално, регионално и на глобално ниво. Од 2019 година работеше во Светското извидничко биро, каде што извршуваше високи раководни функции, последно како директор за стратешка координација и организациски развој за Европа, поддржувајќи 47 национални извиднички организации.

– Неговиот извиднички пат започна во извидничкиот одред „Гоце Делчев“ од Свети Николе, а пред ангажманот на светско ниво, од 2010 до 2018 година, беше генерален секретар на Сојузот на извидници на Македонија. Во овој период активно учествуваше во организирањето национални и меѓународни кампови, натпревари и обуки, како и во менторството на стотици млади извидници и волонтери. Ѓорѓиев, исто така, придонесе во развојот на младинските политики и на граѓанското учество, вклучително и во воспоставувањето на Националниот младински совет на Македонија и работењето на програмите за младинско лидерство, градење капацитети и меѓународна соработка – соопштија од Сојузот на извидници на Македонија.

Според претседателката на Европскиот извиднички комитет, Дијана Слабу, Горан има богато искуство од стратешкото лидерство и од организацискиот развој, со длабоко разбирање на извидничката работа на сите нивоа.

– Со нетрпение очекуваме соработка со него за развојот на извидничката дејност во Европа – нагласи таа.

Горан Ѓорѓиев ја презеде новата функција вчера и ќе соработува тесно со Европскиот извиднички комитет и со светското раководство за зајакнување на поддршката за националните извиднички организации и за зголемување на влијанието на извидничката дејност низ Европа.