Google одговори на виралните објави на социјалните медиуми и портали во кои се тврди дека компанијата ја променила својата политика и ја користи содржината од вашето Gmail сандаче за обука на вештачка интелигенција.
Според овие објави, единствениот начин корисникот да се откаже од обуката би бил да ги оневозможи „smart features“ опциите.
Сепак, портпаролката на компанијата Џени Томпсон изјави за The Verge дека овие обвинувања се лажни: „Не сме ги промениле ничии поставки, Gmail Smart Features постои со години и не ја користиме вашата Gmail содржина за обука на нашиот Gemini AI модел.“
Во јануари, Google ги ажурираше своите поставки за персонализација на паметни функции, така што сега можете да ги исклучите одделно за Google Workspace и одделно за други производи на Google, како што се Maps и Wallet.
Кога се вклучени, паметните функции на Gmail прават работи како проверка на правопис, следење на нарачки или едноставно додавање летови во вашиот календар. Ако ја вклучите опцијата под Workspace, ќе се појави известување во кое се вели дека „се согласувате да му дозволите на Google Workspace да ја користи вашата содржина и активност од Workspace за да го персонализира вашето искуство“.
Сепак, според компанијата, ова не значи дека Google ја користи содржината на вашите е-пораки за обука на модели со вештачка интелигенција.
