Големи пожари во Австралија: Државата Викторија е прогласена за зона на катастрофа

Илјадници пожарникари се борат со натчовечки напори денес во австралиската држава Викторија за да ги контролираат пожарите во грмушките што оставија уништени домови, изгореа области покриени со ниска вегетација и грмушки и го прекинаа снабдувањето со електрична енергија на десетици илјади жители.

Повеќето од пожарите избувнаа во средината на неделата, поради интензивен топлотен бран во југоисточна Австралија. Досега проголтаа повеќе од 300.000 хектари грмушки, објавија властите утрово, додавајќи дека десет големи пожари се уште се активни низ целата држава.

Најлоши пожари од „Црното лето“

Повеќе од 130 објекти, вклучувајќи домови, се уништени, а околу 38.000 станбени и деловни објекти останаа без електрична енергија поради пожарот, соопштија властите, додавајќи дека ова се најлошите пожари во државата од таканареченото Црно лето 2019-2020 година, кога пожарот уништи област со големина на Турција и уби 33 Австралијанци.

Премиерката на Викторија, Џасинта Алан, изјави дека илјадници пожарникари се на терен обидувајќи се да го ограничат ширењето на пожарот.

„Се обидуваме да ги ставиме пожарите под контрола каде и да можеме“, рече Алан на прес-конференција во главниот град на државата, Мелбурн.

„Може да се очекуваат екстремни и опасни пожари“

Порано денес, австралискиот премиер Ентони Албанезе изјави дека нацијата се соочува со ден во кој може да се очекуваат „екстремни и опасни“ пожари, особено во Викторија, каде што поголемиот дел од државата е прогласен за „зона на катастрофа“.

„Во ова тешко време, моите мисли се со Австралијанците во погодените регионални заедници“, рече Албанезе во телевизиско обраќање до нацијата од Канбера.

Еден од најголемите пожари беснее во близина на градот Лонгвуд, околу 112 км северно од Мелбурн, каде што досега изгореа 130.000 хектари грмушести површини, уништувајќи околу 30 згради, бројни лозја и обработливо земјиште, соопштија властите.

Десетици заедници што живеат во близина на пожарите се евакуирани, а бројни државни паркови и кампови се затворени. Денес е издадено предупредување за топлотен бран за големи делови од Викторија, додека предупредувањата за пожар се во сила за соседната држава Нов Јужен Велс и Австралиската престолнинска територија, изјави главниот метеоролог на државата, пренесе „Индекс“.