Голема рафинерија за нафта на „Лукоил“ престана со работа откако беше погодена од украински беспилотни летала

Голема рафинерија за нафта „Лукоил“ во Волгоград, Русија, е затворена откако беше погодена од украински беспилотни летала, соопштија денес три извори запознаени со инцидентот, пренесе „Бета“.

Украина во последните месеци напаѓа руски рафинерии за нафта, складишта и цевководи, а украинската енергетска инфраструктура е исто така честа цел на руски напади во војната што се приближува кон својата четврта година.

„Лукоил“ не одговори на барањето за коментар.

„Рафинеријата е затворена. CDU-5 гореше, хидрокрекерот беше делумно оштетен“, рече еден од изворите, кој зборуваше под услов да остане анонимен.

Рафинеријата во Волгоград преработи 13,7 милиони тони нафта во 2024 година, или 5,1 процент од вкупниот обем преработен од руските рафинерии.

Украина ја нападна Русија со најмалку 75 беспилотни летала во четврток, предизвикувајќи пожар во индустриска зона на јужниот град Волгоград, при што загина најмалку едно лице и беа откажани десетици летови низ целата земја, соопштија руските власти.

Гувернерот на Волгоградската област, Андреј Бочаров, изјави дека 48-годишниот маж бил убиен од шрапнели и дека пожарот избувнал во индустриска зона во Красноармејската област во Волгоград, порано позната како Сталинград.

Рафинеријата во Волгоград се наоѓа во областа, која повеќе пати била нападната од Украина.