Голема екоакција во Кисела Вода

Доколку дозволат временските услови, од понеделник, Општина Кисела Вода, преку Секторот за месни заедници, заедно со јавното  претпријатие „Паркови и зеленило“, ќе започнат еднонеделна интензивна акција за чистење и уредување на парковите и на јавните зелени површини на целата територија на општината.

Акцијата ќе се реализира со целата расположлива механизација и теренски екипи, а ќе опфати собирање лисја, расчистување паднати гранки и отпадоци, поткастрување дрвја, сечење суви гранки, како и уредување на јавните тревници.

Од Општина Кисела Вода информираат дека активностите ќе се одвиваат низ парковите и низ сите јавни зелени површини во Кисела Вода, а ваквите акции ќе бидат чести и во иднина.

Ова било договорено на денешната средба на градоначалничката на Општина Кисела Вода, Бети Стаменкоска-Трајкоска, со директорот на ЈП „Паркови и зеленило“, Муамер Сефери.

– Со директорот на ЈП „Паркови и зеленило”, Муамер Сефери, договоривме засилена соработка и конкретни чекори за подобрување на изгледот на нашата општина. Нашата цел е Кисела Вода да биде почиста, поуредена и попријатна за живеење, а ваквите акции ќе продолжат и во наредниот период – изјави Стаменкоска-Трајкоска. Таа повикува и граѓаните заеднички да придонесат кон почиста животна средина, со одговорно однесување и грижа за заедничките јавни простори.