Голем пожар на хрватското крајбрежје: „Спасуваме куќа по куќа“

Шефот на противпожарната служба вели дека ситуацијата е сериозна. Евакуацијата на населението и туристите е во тек.

Голем пожар избувна помеѓу Омиш и Макарска на хрватскиот брег, а пожарникарите велат дека во моментов немаат контрола и дека е тешко да се локализира, пренесе хрватски „Индекс“.

„Спасуваме куќа по куќа, сè е во опасност“, изјави Славко Туцаковиќ, раководител на противпожарната служба, за Хрватската телевизија.

Евакуацијата на населението и туристите е во тек.

„Гаснењето на пожарот е отежнато од ветерот, па канадерите беа принудени да се вратат во Сплит“, додаде тој.

Тој ја опиша ситуацијата како сериозна.

Сплитската противпожарна служба доби повик околу 7 часот наутро на 21 јуни дека голем пожар избувнал во областа Писак, во близина на Омиш.

Гори трева, ниска вегетација и шума, на тешко пристапен терен.

Сè уште не е познато што го предизвикало пожарот.

„Луѓето велат дека во последните денови во градот е видено лице на мотор како предизвикува пожари“, цитираше „Индекс“ неименуван жител.

Некои очевидци тврдат дека во пожарот биле оштетени и некои автомобили.

Локалните медиуми известуваат дека полициски глисер и брод на пристанишните власти ги евакуираат луѓето по море.

Силна бура носи чад и пепел сè до островот Хвар.

Шумските пожари на хрватскиот брег не се невообичаени, особено во лето.

Во август 2024 година, пожарникарите се бореа со денови и ноќи, од копно и од воздух, за да го локализираат пожарот што избувна во близина на Сплит, најголемиот град на хрватскиот брег.

Изгорени се 700 хектари шума, ниска вегетација и трева, а тројца пожарникари се полесно повредени, објави тогаш Хрватската радиотелевизија.