Од следната година Во Хрватска ќе се воведе можноста за работа со полно работно време со половина пензија, а владата очекува ова да привлече илјадници постари граѓани назад на пазарот на трудот. Хрватска го зголеми бројот на вработени за околу 40 илјади за една година, а на крајот на јули, бројот на лица регистрирани во системот за пензиско осигурување беше близу рекордни 1,8 милиони.
Според проценките, границата од 1,8 милиони би можела да се пробие следната пролет, а странските работници и пензионерите играат клучна улога во овој раст, пишува Вечерњи лист.
Во моментов, 37.955 пензионери се вработени со скратено работно време, што е за околу 5.500 повеќе отколку на почетокот на годината и 10 илјади повеќе отколку пред две години. Меѓу нив, научници, експерти, инженери, директори и административни работници се во преден план, додека некои извршуваат и физички напорни работи.
Законските измени го отвораат пазарот на трудот за сите категории пензионери, вклучувајќи ги занаетчиите и корисниците на семејни и инвалидски пензии. Сепак, во пракса, се евидентираат и злоупотреби: работодавците често пријавуваат помалку часови отколку што вработениот работи, а разликата ја плаќаат без данок.
Коефициентот на зависност, исто така, се подобри – денес има 145 вработени на 100 пензионери, околу дваесет повеќе отколку пред десет години. За разлика од Хрватска, Словенија го воведува моделот 80-90-100, кој им овозможува на постарите работници да работат со скратено работно време, со речиси целосна плата и придонеси, што ги охрабрува да останат подолго на пазарот на трудот, додава Вечерњи лист.
