Македонскиот пијанист Дино Имери, еден од највпечатливите уметници на својата генерација, на 13 јуни ќе настапи во Виена – глобалниот и историски центар на класичната музика. На програмата е капиталното дело на Јохан Себастијан Бах – „Голдберг варијации“, кое ретко се изведува на концертните сцени низ Европа, токму поради неговата исклучителна сложеност и длабочина.
Концертот ќе се одржи во престижниот „Бехштајн центрум“ во Виена. Ова дело, коешто Имери премиерно го изведе во Скопје во рамки на „Недела на Бах“, привлече големо внимание од публиката и критиката. Програмата бара техничка виртуозност и уметничка зрелост, а само мал број пијанисти во светот се осмелуваат да го стават во својот концертен репертоар.
„Настап во Виена е сон на секој уметник. Особено ми е чест да ги изведам ‘Голдберг варијациите’ – едно од најмонументалните дела на класичната литература, на сцена пред публика која секојдневно слуша врвни уметници и програми. Работев на ова дело повеќе од пет години. Искрено им се заблагодарувам на Н.Е. господин Освит Росоклија и на поддржувачите на концертот – без нив оваа реализација немаше да биде можна“, изјави Дино Имери пред настапот.
Концертот е отворен за сите љубители на класичната музика и е во организација на македонската амбасада, со поддршка од Македонско-австрискиот бизнис клуб и австриска компанија.
