„Ѓоковиќ се уште не разбира, Надал и јас веќе сфативме“

Поранешниот швајцарски тенисер Роже Федерер (44) беше примен во „Куќата на славните“. Тој доби големо признание, целосно заслужено и очекувано. По сето тоа зборуваше за соперништвото што го имал со Новак Ѓоковиќ (38) и со Рафаел Надал (39) и објасни што се променило откако се пензионирал.

„Веројатно самиот прием беше полесен отколку што мислев дека ќе биде. Никогаш не сонував да станам член на ’Куќата на славните’, ниту да го освојам Вимблдон. Се надевав дека ќе станам професионален тенисер и дека не сум направил грешка да го напуштам училиштето на 16 години. Сега, од оваа перспектива, не би променил ништо. Би сакал повторно да доживеам сè, и подеми и падови, што ме доведоа до местото каде што сум сега“, започна Роже.

Освојувачот на 20 гренд-слем титули во кариерата откри и кога имал најголеми проблеми.

„Најтешката транзиција за мене беше транзицијата од јуниор во професионалец. На почетокот беше одлично. Влегувате во соблекувалната и ги гледате Пит Сампрас, Андре Агаси, Тим Хенман, Карлос Моја и многу други и си мислите ’ова е врвот’. Подоцна сè станува многу посериозно и поинтензивно. Тоа беше многу тешка фаза за мене. Тогаш си помислив, „се чини дека не ги прочитав ситните букви во тенискиот договор“. Не беше толку забавно, таа прекумерна сериозност многу ме погоди, би рекол дека периодот од 18 до 21 година ми беше доста тежок.“

„Новак сè уште не разбира“

Федерер беше прашан и за соперништвото што го има со Новак Ѓоковиќ и што мисли за „големата тројка“ што ја формираше со него и Рафа.

„Таквото ривалство со Новак е нешто навистина големо. Сега гледам на тоа на сосема поинаков начин отколку порано, од поинаква перспектива. Новак сè уште не го разбира тоа, Рафа почна малку по малку да го разбира. Кога сè уште си играч, не можеш да размислуваш за тоа како што јас размислувам сега. Со текот на времето, сè помалку се гледаш себеси како тенисер и ги гледаш работите на поинаков начин. Интересно е што некој можел да разбере нешто поинаку, да го земе при срце, а дури и да не се сеќава на тоа. Би сакал сите да можеме да седнеме и да разговараме за тие стари времиња.“

Какво е наследството на Роже?

Швајцарецот даде интересен одговор и на прашањето за неговото наследство и што мисли дека му оставил на тенисот.

„Многумина ми кажаа дека успеав да му помогнам на тенисот да влезе во нова ера, а тоа многу ми значи. Се надевам дека успеав да го подигнам и да го зајакнам тенисот на светско ниво, дека доаѓаат повеќе фанови, дека расте, дека играчите заработуваат повеќе и дека тениските ѕвезди се попрепознатливи низ целиот свет. Исто така, сакам да кажам дека Били Џин Кинг, исто така, даде огромен придонес за успехот на тенисот. Исто така, постојат некои политички прашања во тенисот, но генерално, би рекол дека се надевам дека придонесов за развојот на овој спорт“, заклучи Федерер.