Ѓоковиќ најпосле проговори за пензионирањето: Ќе биде емотивно

Српскиот тенисер Новак Ѓоковиќ секој ден е сè поблизу до пензија. Тенисот ќе загуби дел од својата популарност, бидејќи последниот претставник на златната ера наскоро ќе се пензионира. И тој реши да проговори за тоа.

Професионалните спортисти често го одложуваат пензионирањето за да не се соочат со реалноста, но не е случај тоа и со Новак Ѓоковиќ. Тој сака да се натпреварува против најдобрите, да игра против нив и да се обиде да ги победи. Ќе продолжи да спортува дури и кога нема да биде на најголемите светски турнири, откако емотивно ќе се збогува со тенисот, кој го направи познат.

• Секогаш се обидував да размислувам за работи надвор од тенисот, особено во последните 12-15 години. Слушнав и од тенисерите и од другите спортисти за менталната борба што ја имале по завршувањето на кариерата, особено доколку не биле подготвени за таа транзиција. Не мислам дека може целосно да се подготвите за тоа. Да, ќе биде тажен ден за мене кога ќе го напуштам тенисот, ќе биде многу емотивно, го знам тоа, но она за што зборувам е адреналинот што го носи спортот – мора да се пренасочи, да се канализира поинаку – рече Ѓоковиќ во поткастот на Џеј Шети.

Додека не одлучи да ѝ стави крај на најголемата кариера во историјата на тенисот, Новак Ѓоковиќ ќе продолжи да биде максимално посветен. Неговиот животен стил е специфичен, се грижи за своето тело во секое време, но би сакал човештвото да го следи неговиот пример во поголема мера.

• Ги сакам спортовите и ќе ги играм целиот мој живот, клучно е човек да биде активен. Од друга страна, ми треба предизвик. Тенисот е голем дел од мојот живот, но имам и различни интереси: благосостојбата е моја страст, здравиот живот, а тоа е широко поле. Хидратација, исхрана, вежбање, сон – би сакал светот да биде поздрав. Малите чекори во таа насока се вредни и имаат ефект. Дури и некои спортисти не ја разбираат важноста на хидратацијата. Не е само водата туку и минералите, разните додатоци итн. Најдобро е сè да се внесува преку храната, но не е можно сè – додаде Новак.