Српскиот тенисер Новак Ѓоковиќ денес објави дека нема да учествува на претстојниот Мастерс во Париз, пренесе „Бета“.
„Драг Паризе, за жал нема да се натпреварувам на овогодинешниот Мастерс. Имам прекрасни спомени и големи успеси низ годините, особено фактот дека успеав да ја освојам титулата седум пати. Се надевам дека ќе се видиме следната година. Ви благодарам“, напиша петтиот тенисер во светот во објава на социјалната мрежа „Икс“.
Ѓоковиќ го има освоено Мастерсот во Париз седум пати, а на кој не учествуваше ниту минатата година.
Овогодинешното натпреварување на Мастерсот во Париз е закажано од 27 октомври до 2 ноември.
