Шефот на тимот на Ферари во Ф1, Фредерик Васер, отворено призна дека тој и Луис Хамилтон „глупаво“ го потцениле предизвикот од преминувањето на британскиот возач во италијанскиот тим.

Седумкратниот светски шампион се приклучи на италијанскиот тим на почетокот од сезоната по 12 години во Мерцедес, а неговата дебитантска сезона не ги исполни очекувањата.

Хамилтон моментално е шести во генералниот пласман на возачи, без ниту еден пласман на подиум по 14 од 24-те трки закажани за сезоната. Особено тежок момент за 40-годишниот Британец се случи пред летната пауза, во Унгарија, каде што се квалификуваше на 12-то место, додека неговиот тимски колега Шарл Леклер ја освои пол-позицијата. Хамилтон се опиша себеси како „бескорисен“ и додаде дека Ферари „веројатно треба да ги смени возачите“.

  • Луис и јас, заедно, веројатно ја потценивме промената на средината. Тој беше практично во истиот систем 20 години. Мекларен и Мерцедес ја делеа истата култура, истите луѓе, истите мотори… А потоа доаѓа во Ферари, сосема поинаква средина, и глупаво е што очекувавме дека сè ќе има под контрола, истакна Васер во интервју за „The Race“.

Хамилтон уште за време на Големата награда на Белгија призна дека стартот во Ферари бил „вистинска борба“ и најави дека за време на летната пауза „ќе има солзи“. Тој исто така откри дека е активно вклучен во дискусиите со раководството на тимот и поднесува предлози за подобрување на ситуацијата за следната сезона.

Васер дополнително објасни зошто оваа транзиција може да биде потешка за Хамилтон отколку што беше, на пример, за Карлос Саинц, кого го замени.

  • Карлос е навикнат да менува тимови, Торо Росо, Рено, Мекларен, Ферари, а сега и Вилијамс за само осум години. Луис го немаше тоа искуство, тој беше во истата средина со години, порача Васер.

Тој додаде дека постои голема културна разлика помеѓу Ферари и Мерцедес, поголема дури и отколку помеѓу Мерцедес и Мекларен, за која признава дека и тој и Хамилтон ја потцениле.

ИЗДВОЕНИ

ПОВРЗАНИ ОБЈАВИПОВЕЌЕ ОД АВТОРОТ