
Германскиот канцелар Фридрих Мерц изјави во понеделник дека е подготвен војната во Украина да трае долго „со оглед на тоа што војните обично завршуваат со воен пораз или економска исцрпеност“, што, како што рече, се сценарија што тој „не ги гледа на хоризонтот“.
„Се подготвувам оваа војна да трае долго. Се прават напори преку интензивни дипломатски иницијативи за што поскоро завршување на војната, но тоа не може да биде по цена на капитулација на Украина, бидејќи тогаш Русија едноставно би го насочила своето внимание кон некоја друга земја“, изјави Мерц за германскиот јавен радиодифузен сервис ZDF.
Коментарите на Мерц доаѓаат еден ден пред рокот што го постави американскиот претседател Доналд Трамп за средба меѓу претседателите на Русија и Украина за да се отвори патот за мировни преговори, објави Ројтерс, потсетувајќи дека Трамп се закани со последици ако средбата не се одржи.
Канцеларот Мерц и францускиот претседател Емануел Макрон оценија дека вината за неуспехот на состанокот е кај рускиот претседател Владимир Путин и ги повикаа САД да воведат построги санкции кон Москва, пренесува „Танјуг“.