Германците размислуваат за враќање на златните резерви од Америка: „Таму веќе не е безбедно“!

Во Германија се зголемуваат повиците за повлекување на златните резерви во вредност од милијарди евра од американските државни обврзници, поттикнати од промените во трансатлантските односи и непредвидливоста на Доналд Трамп. Германија ги држи вторите најголеми златни резерви во светот, со околу 1.236 тони – во вредност од околу 164 милијарди евра – кои се чуваат во Њујорк, објавува „Гардијан“.

Дел од германските политичари и економисти сметаат дека во услови на геополитичка нестабилност и затегнати трансатлантски односи, не е разумно толкаво стратешко богатство да се наоѓа надвор од државата.

Емануел Менх, водечки економист и поранешен раководител на истражувањето во германската централна банка, Бундесбанк, е за репатријација на златото, сметајќи дека е премногу „ризично“ да се задржи во САД под сегашната администрација.

Менх е само последниот во низата експерти кои веруваат дека таков потег би бил во согласност со стремежот на најголемата европска економија за поголема стратешка независност од САД.

Михаел Јегер, раководител на Здружението на даночни обврзници на Европа (TAE), исто така верува дека Берлин треба да дејствува, наведувајќи ја изразената желба на САД да го преземе Гренланд како причина за загриженост.

„Трамп е непредвидлив и прави сè за да генерира приход. Затоа нашето злато повеќе не е безбедно во трезорите на Федералните резерви“, изјави Јегер за „Рајнише пост“. „Што ќе се случи ако провокацијата околу Гренланд продолжи? … Се зголемува ризикот дека германската Бундесбанка повеќе нема да може да пристапи до своето злато. Затоа треба да ги репатрира своите резерви.“

Германија ги поседува вторите најголеми златни резерви во светот, веднаш по САД, а околу една третина од нив – повеќе од 1.200 тони – се чуваат во трезорите на Федералните резерви во Њујорк.

Особено остри се предупредувањата дека идните одлуки на американската администрација би можеле да создадат правна или политичка несигурност околу пристапот до златото, иако формално сопственик останува Германија. Затоа, дел од експертите бараат златото да се репатрира како мерка за зајакнување на економскиот суверенитет и финансиската безбедност.

Од друга страна, германската централна банка – Bundesbank – засега смирува и порачува дека нема непосредни планови за повлекување на златните резерви од САД. Според институцијата, златото е безбедно складирано, редовно контролирано и неговото чување во Њујорк има историски и практични причини, поврзани со ликвидноста и довербата во меѓународниот финансиски систем.

Иако во моментов нема официјална одлука, дебатата покажува дека прашањето за златните резерви повторно станува чувствителна тема во европската политика, особено во време на зголемени глобални тензии и неизвесна иднина на односите меѓу Европа и САД.