Генералениот секретар на ОН на Советот на безбедност: Операцијата на САД против Мадуро го крши меѓународното право

Генералниот секретар на ОН, Антонио Гутереш, денес изрази загриженост дека нестабилноста во Венецуела ќе се зголеми откако САД го уапсија претседателот на латиноамериканската земја, Николас Мадуро, во воена операција.

Советот за безбедност од 15 члена се состана во седиштето на ОН во Њујорк само неколку часа пред Мадуро да се појави пред федералниот суд во Менхетен по обвинение за дрога, вклучително и заговор за извршување наркотероризам. Мадуро негира каква било криминална вмешаност.

„Длабоко сум загрижен за можната ескалација на нестабилноста во земјата, потенцијалното влијание врз регионот и преседанот што би можел да се постави за начинот на кој се управуваат односите меѓу државите“, рече Гутереш во изјава доставена до Советот за безбедност од страна на шефицата за политички прашања на ОН, Розмари Ди Карло.

Гутереш ги повика сите актери во Венецуела да се вклучат во инклузивен и демократски дијалог. „Ги поздравувам и сум подготвен да ги поддржам сите напори насочени кон помагање на Венецуелците да најдат мирен пат напред“, додаде тој.

Генералниот секретар на ОН, исто така, изрази загриженост дека американската операција за апсење на Мадуро во Каракас во саботата не е во согласност со правилата на меѓународното право.

„Акт на агресија“

Колумбија, која побара состанок денес, ја осуди американската операција како јасно кршење на суверенитетот, политичката независност и територијалниот интегритет на Венецуела.

„Нема оправдување, под никакви околности, за еднострана употреба на сила за извршување на акт на агресија“, изјави колумбиската амбасадорка во ОН, Леонор Залабата Торес, пред Советот за безбедност. „Ваквите дејствија претставуваат сериозно кршење на меѓународното право и Повелбата на Обединетите нации“, додаде таа.

Правните експерти рекоа дека американската операција била нелегална бидејќи не била овластена од Советот за безбедност на ОН и не претставувала самоодбрана од вооружен напад.

Советот за безбедност на ОН, задолжен за одржување на меѓународниот мир и безбедност, нема простор да преземе конкретни мерки против Соединетите Американски Држави. Соединетите Американски Држави имаат право на вето, заедно со Русија, Кина, Велика Британија и Франција, па затоа можат да блокираат каква било акција.

Против Повелбата на ОН

Повелбата на ОН наведува дека членовите „ќе се воздржат во своите меѓународни односи од закана или употреба на сила против територијалниот интегритет или политичката независност на која било држава“. ОН моментално има 193 земји-членки.

Амбасадорот на САД во ОН, Мајк Валц, вчера го цитираше Член 51 од Повелбата на ОН, според кој ништо „не смее да го намали неотуѓивото право на индивидуална или колективна самоодбрана во случај на вооружен напад врз членка на Обединетите нации“.

Трамп се закани со уште еден напад ако Венецуела не соработува во отворањето на својата нафтена индустрија и спречувањето на протокот на дрога. Трамп, исто така, им се закани на Колумбија и Мексико и рече дека кубанската комунистичка влада „изгледа како да е подготвена да падне“, пренесе „Хина“.