Г7 најави построги санкции кон Русија доколку не се согласи на прекин на огнот во Украина

Групата  седум големи индустријализирани земји (Г7) соопшти дека ќе ги заострат санкциите против Русија доколку Москва не се согласи на прекин на огнот во Украина.

„Ги поздравуваме континуираните напори за постигнување прекин на огнот. Доколку не се постигне таков прекин на огнот, ќе продолжиме да ги истражуваме сите можни опции, вклучително и оние дизајнирани да го максимизираат притисокот, како што е понатамошно заострување на санкциите (против Русија)“, изјавија министрите за финансии и централните банкари на Г7 во изјава за Украина усвоена по нивниот состанок во Канада, објави ТАСС.

Во изјавата, исто така, се вели дека, во согласност со правните системи на земјите, руските средства под нивна јурисдикција ќе останат замрзнати сè додека Русија „не ја надомести штетата нанесена на Украина“.

Г7 во изјавата наведува дека „непоколебливо ја поддржува“ Украина во одбраната на нејзиниот „територијален интегритет и право на постоење“, како и „слободата, суверенитетот и независноста“.

Дополнително, Г7 вети дека ќе помогне во зајакнувањето на довербата на странските инвеститори во Украина, ќе го мобилизира приватниот сектор за извршување на реконструкциски работи и ќе ги продолжи активностите на странската осигурителна индустрија.

Како што е најавено, следната конференција на западните земји за обнова на Украина ќе се одржи на 10 и 11 јули во Рим.

Во исто време, Г7 вети дека ќе преземе мерки заедно со Киев за да ги спречи оние „земји и структури“ кои, според нив, ги финансираат или снабдуваат руските учесници во војната во Украина да учествуваат во реставраторски работи.