Фудбалскиот свет може да биде брутален, тоа го потврди и поранешниот ас на Барса

Поранешниот капитен на Барселона, Жерар Пике, одлучи да се пензионира пред неколку години и да се фокусира на други работи, а веќе имаше неколку бизниси што почна да ги развива пред да ги закачи копачките.

Се пензионираше како еден од најуспешните дефанзивци во светскиот фудбал, освојувајќи сè што можеше на клупско и репрезентативно ниво, а исто така заработи и огромна сума пари.

Сепак, во интервјуто што го даде пред неколку дена, тој се осврна на еден  проблем што е сè поприсутен во светот на фудбалот и откри дека самиот поминал низ тоа и дека во овој случај, дури ни огромната сума пари што ја заработуваат играчите не може да помогне.

Пике зборуваше за менталното здравје на играчите и колку е тешко кога сте мета на критики. Роналд Араухо моментално е во таква ситуација, бидејќи не тренира со Барселона две недели и прашањето е дали некогаш повторно ќе игра за каталонскиот клуб.

„Менталното здравје на професионалните спортисти е тема за која не се зборува доволно. Мора да се земе предвид, имате безброј примери што ја покажуваат важноста на ова, а ситуацијата со Роналд Араухо е една од најновите во низата. Мило ми е што ова полека доаѓа во фокусот на јавноста, со оглед на тоа што професионалниот спорт отсекогаш заостанувал во многу важни теми“, изјави Пике и продолжи:

„Многу добро се сеќавам на времињата кога расизмот беше присутен на стадионите, каде што насилството на трибините беше често. Мислам дека дојде моментот кога мора да кажеме дека е доста и да им забраниме на фудбалерите да бидат лесни мети за секакви напади од страна на јавноста. Денес е толку лесно да се таргетира некого, без да се размислува за последиците.“

Поранешниот дефанзивец на Барселона почувствува на своја кожа колку сурова може да биде јавноста, и тоа во моментите кога ги бележеше најголемите успеси.

„Ја почувствував суровоста на јавноста од прва рака. Играв за Барселона и за шпанската репрезентација во време кога повторно се поставуваше прашањето за независноста на Каталонија. Сите ги знаете моите ставови за Каталонија и сè што имам да кажам за тој период е дека воопшто не се чувствував удобно со работите што беа напишани и кажани за мене“.

„Морав да создадам свој невидлив челичен оклоп со кој успеав да се одбранам од огромните навреди, напади, клетви, притисоци. Не сте свесни колку притисок тоа врши врз една личност. Сите ваши пари се залудни, на крајот на денот сте само човечко суштество со психа и емоции. Достигнувате фаза што не би му ја посакал на никого, исклучително нездрава фаза од психолошка гледна точка“.

Пике рече дека Барселона направила сè што можела со Араухо откако тој се пожалил дека не е во најдобра форма откако добил остри критики по поразот на тимот од Челзи.

„Единствениот начин да се заштитите е да научите како да ги игнорирате постојаните навреди и напади. Основаните и оправдани критики се едно, но постојаното таргетирање е нешто сосема друго. Не сме сите исти, не секој може да се справи со стресот и стресните ситуации, неуспехот на ист начин. Некои едноставно не знаат како да го создадат својот штит што јас го создадов. Од оваа точка, мислам дека Роналд Араухо всушност направи храбар потег, тој рече дека едноставно не може повеќе да го прави тоа и дека е доста. Тоа е најтешкиот чекор.“

„Барселона прави најдобро што може во неговиот случај. Го сослушаа, му покажаа дека се тука за него и го оставија на мира, му дадоа онолку време колку што му е потребно за да се справи со она што го мачи психички“.

„Мислам дека сите навивачи во Шпанија, без оглед на тоа кого навиваат, сега треба да застанат малку и да размислат за себе и за тоа што прават. Фудбалерите не се мети, тие не се некакви креации на кои јавноста им служи за да ги излечат своите лични фрустрации“.