ФТ: Трамп го повикал Зеленски да ги прифати руските услови, го предупредил дека Путин се заканува дека ќе ја „уништи“ Украина

Американскиот претседател Доналд Трамп го повикал украинскиот претседател Володимир Зеленски да ги прифати условите на Русија за прекин на војната меѓу Русија и Украина за време на состанокот во Белата куќа во петокот, предупредувајќи дека рускиот претседател Владимир Путин се заканил дека ќе ја „уништи“ Украина ако Зеленски не се согласи, објави во недела „Фајненшл тајмс“ (FT), а пренесе агенцијата „Ројтерс“.

За време на состанокот, Трамп инсистирал Зеленски да го предаде целиот источен регион Донбас на Русија, постојано повторувајќи ги ставовите што рускиот претседател ги изразил претходниот ден за време на нивниот телефонски разговор, објави весникот, повикувајќи се на извори запознаени со разговорите.

Според „FT“, Украина на крајот успеала да го убеди Трамп да поддржи замрзнување на сегашната фронтова линија. По состанокот, Трамп рекол дека „двете страни треба да ја запрат војната на фронтовата линија“, додека Зеленски рекол дека ова е „важна точка“.

Белата куќа не одговори веднаш на барањето на „Ројтерс“ за коментар за извештајот на „FT“.

Зеленски пристигна во Белата куќа во петокот во потрага по оружје за да ѝ помогне на Украина да ја продолжи борбата, но беше пречекан од американски претседател кој изгледаше повеќе фокусиран на постигнување мировен договор.

Во телефонскиот разговор во четвртокот, Путин, според FT, понудил да се откаже од помали области на јужната линија на фронтот, во регионите Херсон и Запорожје, во замена за многу поголеми делови од Донбас кои сега се под украинска контрола.

Тоа е помалку од неговите првични барања од 2024 година, кога побара од Киев да го предаде целиот Донбас, како и Херсон и Запорожје на југ – област од речиси 20.000 квадратни километри.

Портпаролот на Зеленски не одговори веднаш на барањето за коментар, испратено по неколку часа, за тоа дали Трамп извршил притисок врз Зеленски да прифати мир под руски услови.

Трамп и Путин се согласија во четвртокот да одржат втор самит за војната во Украина во следните две недели, моментално планиран во Будимпешта, по состанокот на 15 август во Алјаска, кој не доведе до пробив во преговорите.