Фрлено куче од Железничката станица, починало поради внатрешно крвавење

Непознат сторител извршил монструозен чин, фрлајќи куче од Железничката станица во Скопје. Повикот за оваа крајно вознемирувачка случка стигнал до јавното претпријатие „Лајка“, но и покрај обидите да биде спасено, кучето умрело. Оттаму велат дека овој инцидент повторно потсетува до каде може да оди човечката суровост.

– Нашиот тим веднаш интервенираше и го префрли кучето во амбуланта, каде што беа вложени максимални напори од страна на нашите доктори. За жал, и покрај сета борба, Нори, куче што уште во 2023 година помина третман кај нас, го загуби животот поради силно внатрешно крвавење – соопштија од ЈП „Лајка“.

Нори честопати била гледана на повеќе локации во градот и, според сите сознанија, се работело за питомо и мирно куче, кое никому не му пречело. Од ЈП „Лајка“ уверуваат дека овој бесправно и сурово одземен живот нема да остане незабележан.

– Настанот веднаш ќе биде пријавен до надлежните институции, до кои апелираме да ги искористат сите механизми за пронаоѓање и за санкционирање на сторителот на ова тешко кривично дело – велат од ЈП „Лајка“.

Притоа, ги охрабруваат граѓаните доколку се сведоци на вакви дела, веднаш да ги пријават.

– Само со заедничка реакција можеме да му ставиме крај на ваквото насилство и да изградиме општество во кое животите на животните се почитуваат – нагласуваат од претпријатието.

(А. П.)